Były namieśnik staršyni Minskaha rajvykankama za karupcyjnyja złačynstvy pryhavorany sudom Žodzina da piaci hadoŭ pazbaŭleńnia voli z kanfiskacyjaj majomaści i pazbaŭleńniem prava zajmacca peŭnaj dziejnaściu. Pryhavor byŭ vyniesieny 10 červienia.
Jak paviedamiła BiełaPAN staršy opierupaŭnavažany pa asabliva važnych spravach hałoŭnaha ŭpraŭleńnia pa baraćbie z ekanamičnymi złačynstvami MUS Biełarusi Vieranika Paśmiećjeva, u pole zroku supracoŭnikaŭ HUBEZ čynoŭnik trapiŭ jašče ŭ pačatku 2013 hoda. Pavodle apieratyŭnaj infarmacyi, jon złoŭžyvaŭ słužbovymi paŭnamoctvami ŭ intaresach trecich asob, jakim niezakonna vydzielili ziamielnyja ŭčastki na terytoryi Baraŭlanskaha sielskaha vykankama. Znachodziačysia na adkaznaj dziaržaŭnaj pasadzie, čynoŭnik kuryravaŭ dziejnaść słužb i arhanizacyj, jakija ŭvachodziać u skład žyllova-kamunalnaj haspadarki Minskaha rajona, u tym liku i adździeła ŽKH Minskaha rajvykankama.
Padčas pravierki było ŭstanoŭlena, što da byłoha namieśnika staršyni Minskaha rajvykankama ŭ 2010 hodzie źviarnulisia znajomyja z prośbaj nabyć va ŭłasnaść ziamielnyja ŭčastki ŭ rajonie. Tady čynoŭnik daŭ ukazańnie dvum svaim padnačalenym, jakija mieli patrebu ŭ palapšeńni žyllovych umoŭ, aformić na siabie ziamielnyja ŭčastki ŭ vioscy Drazdova Minskaha rajona i pradać ich trecim asobam.
Paśla vydzialeńnia ziamielnych učastkaŭ i budaŭnictva na ich padmurkaŭ padnačalenyja zarehistravali na svajo imia abjekty nieruchomaści, jakija ŭ dalejšym pradali trecim asobam za 45 młn. rubloŭ i 20 młn. rubloŭ, pry hetym svaich pakupnikoŭ jany navat nie bačyli i nijakich hrošaj ad ich nie atrymlivali.
U suviazi z tym što ŭkazańnie pastupiła ad niepasrednaha načalnika, apošnija, jakija byli zaležnyja ad jaho pa słužbie, byli vymušanyja pahadzicca ź niezakonnym ukazańniem svajho kiraŭnika, bo bajalisia stracić pracu.
Akramia taho, apieratyŭniki ŭstanavili i inšyja cikavyja padrabiaznaści, nazvany fakt złoŭžyvańniaŭ čynoŭnika nie adzinkavy. Stała viadoma, što były namieśnik staršyni rajvykankama niezakonna nabyŭ u 2007 hodzie va ŭłasnaść trochpakajovuju kvateru dziaržaŭnaha žyllovaha fondu na vulicy Zacharava ŭ Minsku płoščaj bolš za 100 kv. mietraŭ.
Rasśledavańniem kryminalnaj spravy zajmałasia hałoŭnaje ŭpraŭleńnie pa rasśledavańni złačynstvaŭ u śfiery arhanizavanaj złačynnaści i karupcyi Śledčaha kamiteta, śledstva pradjaviła złamyśniku abvinavačańnie ŭ złoŭžyvańni słužbovymi paŭnamoctvami, pieravyšeńni ŭłady i słužbovych paŭnamoctvaŭ, učynienych z karyślivaj i inšaj asabistaj zacikaŭlenaści asobaj, jakaja zajmaje adkaznaje stanovišča (na padstavie č. 3 art. 424 i č. 3 art. 426 KK).
U dachod dziaržavy buduć viernutyja niezakonna vydzielenyja dva ziamielnyja ŭčastki i słužbovaja kvatera.
Pryhavor suda jašče moža być abskardžany va ŭstanoŭlenym zakonam paradku.
