Učora pres-słužba Libieralna-demakratyčnaj partyi raspaŭsiudziła pres-reliz ab zaklučeńni pahadnieńnia ab supracoŭnictvie pamiž minskimi abłasnymi arhanizacyjami ŁDP i AHP. Padpisvali ich kiraŭniki abłasnych arhanizacyj Pilipčuk i Vałčanin.
My zapytalisia ŭ lidara AHP Anatola Labiedźki, što značyć hetaje pahadnieńnie: «Nie moža być nijakaha pahadnieńnia i supracoŭnictva pamiž AHP i partyjaj Hajdukieviča.
My znachodzimsia na roznym polusach. Partyja Hajdukieviča – praŭładnaja, naša – apazicyjnaja. Nijakaha pahadnieńnia niama i być nie moža. Jość podpis sp.Vałčanina, ale ni Rada AHP, ni jahonyja namieśniki nie viedali pra takuju inicyjatyvu. Nichto nie davaŭ svajoj zhody. Padpisańnie adbyłosia z hrubymi parušeńniami statutu. Vidać, užo zaŭtra Rada razhledzić hetaje pytańnie».
Ci nie aznačaje «pakt Pilipčuka-Vałčanina» sprobaj libieralnych-demakrataŭ pieraciahnuć pierad prezidenckimi vybarami niekatorych aktyvistaŭ AHP? «My, mabyć, adzinaja partyja, jakuju nie atrymałasia ni pakałoć, ni raskałoć. U centralny aparat AHP uvachodziać takija ludzi, jak Stanisłaŭ Bahdankievič ci Zinaida Bandarenka, jak hetych ludziej možna pierakupić ci pieraciahnuć kudyści? Adzinaje, što śpiecsłužby mohuć rabić – heta škodničać dzieści na rehijanalnym uzroŭni. Ja nie vyklučaju, što pierad vybarami takija sproby mohuć uźnikać», - kaža sp.Labiedźka.
Anatol Labiedźka vyłučany kandydatam ad AHP na nastupnyja prezidenckija vybary.
Kamientary