«Dzie, u jakoj krainie znachodzicca AAN? Voś my z toj krainy budziem brać prykład», — skazaŭ ministr. Na jaho dumku, hetaja rezalucyja była pryniata, «kab dahadzić palitycy, a nie zdarovamu sensu».
«Zdarovy sens taki — davajcie spytajem ludziej u tych krainach, dzie admovilisia ad śmiarotnaha pakarańnia. Ja nie liču, što Rasija z hetym bitcaŭskim mańjakam pastupiła idealnym varyjantam. Tyja ludzi, chto paciarpieŭ ad jaho złačynstvaŭ, dumajuć taksama, jak i ja», — skazaŭ U.Navumaŭ.
Jon adznačyŭ, što pryniaćcie rašeńnia ab zabaronie śmiarotnaha pakarańnia ad jaho nie zaležyć.
«Nie ja budu prymać hetaje rašeńnie. Ale ja b chacieŭ, kab uličvałasia mierkavańnie tych ludziej, jakija pakutujuć ad złačynstvaŭ, a nie tych, jakija prykryty niejkimi lhotami i prymajuć takija rašeńni», — skazaŭ ministr.
Pry hetym jon adznačyŭ, što ŭ Biełarusi za apošnija piać hadoŭ kolkaść zarehistravanych zabojstvaŭ paśladoŭna skaračajecca. «A ŭ ich, u luboj krainy, dzie niama śmiarotnaha pakarańnia, usio jakraz naadvarot», — zajaviŭ U.Navumaŭ.
Prapanovu ab uviadzieńni maratoryja 15 listapada padtrymali 99 dziaržaŭ — členaŭ AAN, suprać vykazalisia 52, jašče 33 — ustrymalisia. Dakumient byŭ uniesieny ad imia 74 dziaržaŭ i zaklikaje krainy admovicca ad prymianieńnia śmiarotnaha pakarańnia, jakoje supiarečyć asnoŭnym pryncypam AAN.
Biełaruś — adzinaja ź jeŭrapiejskich krain, jakaja praktykuje vyšejšuju mieru pakarańnia — pry hałasavańni ŭstrymałasia. Rasija prahałasavała ŭ padtrymku ŭviadzieńnia maratoryja. Suprać dakumienta vystupili Kitaj, Irak, Iran i ZŠA.