WTF! Jakoha čorta (kamiedyja)
Režysior: Rafael Frydman
U rolach: Remi Hajar, Patryk Rejnal, Frank Bruner, Ełban Ivanof, Silvien Katan, Hrehary Nardeła, Brydžyt Maarci
Francyja, 81 chv.
U filmie raskazvajecca historyja realnaha čałavieka, jaki atrymaŭ šyrokuju papularnaść dziakujučy svaim rolikam u internecie, pravakatara, papularnaha komika Jeŭropy Remi Hajara.
Jaho klipy źbirajuć miljardy prahladaŭ, u jaho miljony fanataŭ. Ale adnojčy jon vyrašyŭ pastaleć: ažaniŭsia, uładkavaŭsia na pracu na aŭtastajancy, paabiacaŭ ciažarnaj žoncy, što kinuŭ svaje svavolstvy i navat pačaŭ lačycca ad žadańnia «być čort viedaje kim i rabić čort viedaje što».
Bolšaja častka filma składajecca z rolikaŭ, jakija sapraŭdny Remi Hajar zdymaŭ na schavanuju kamieru i vykładaŭ u internecie.
Mienšaja ŭjaŭlaje saboj karotki apovied pra toje, jak 39-hadovy mužčyna, kinuŭšy viasiołyja i časta niebiaśpiečnyja prydumki, sprabuje zažyć zvyčajnym siamiejnym žyćciom dziela kachańnia da dziaŭčyny. Finał historyi pradkazalny. Stužka nie maje vialikaj mastackaj vartaści, takich rolikaŭ u siecivie miljon, a žarty nie zaŭsiody biaskryŭdnyja. Cikavaść vyklikaje chiba što zdolnaść Hajara niezaŭvažna pranikać u miescy z dobraj achovaj, kab adzdymać na kamieru svoj žart.
