Haztromb

«Hazprom» padvioŭ vyniki prezydenckich vybaraŭ u Biełarusi», – žartuje maskoŭski «Kommiersant'». U Miensku nie da žartaŭ. Nibyta j razumieli, što durnicy nia budzie. Ale ž kab tak kruta...

I kali kiraŭnik «Hazpromu» Miler eŭfemistyčna skazaŭ pra ceny «eŭrapiejskaha ŭzroŭniu», to jahony namieśnik Razanaŭ praz paru dzion jak ćvik ubiŭ: z nastupnaha hodu – uzdymiem utraja! To bok – pad 140 dalaraŭ.

Navat dyscyplinavanyja mienskija čynoŭniki zaburčeli pra šantaž.

Tym časam palityčnyja dyletanty i z rasiejskaha, i ź biełaruskaha boku zaharelisia nadziejami.

Tamtejšyja vialikadziaržaŭniki puskajuć ślinki, što narešcie ździejśnicca doŭhačakany anšlus – a inačaj kudy «baćku» padziecca?

Pacirajuć ruki i asobnyja našy baraćbity: nu, usio, kapiec, Pucin narešcie zvalić dyktatara!

Asabliva niasłušnaj padajecca versija, što biełaruskaha kiraŭnika chočuć zmusić da pasady vice-prezydenta sajuznaje dziaržavy. «Tady rasiejskaja elita atrymaje prablemu, u jakoj jość imia i proźvišča – Alaksandar Łukašenka, – kaža palitolah Valer Karbalevič. – Kali jon z pasady staršyni antykarupcyjnaj kamisii raskruciŭsia, to ŭžo z druhoj pazycyi ŭ sajuznaj dziaržavie...»

Nasamreč, pakul što idzie hulnia muskułami. Preludyja da čarhovaha handlu vakoł łasych kavałkaŭ ułasnaści.

Adno što hetym razam Maskva budzie daciskać. Kolki možna zastavacca z nosam zamiž pakietu akcyjaŭ «Biełtranshazu»? Razanaŭ deklaravaŭ adkrytym tekstam, što jahonaja karparacyja choča pačuvacca sapraŭdnaj haspadyniaj biełaruskaj truby – ułučna z hazaraźmierkavańniem i realizacyjaj praduktu spažyŭcam.

Łukašenka ž, zdajecca, spaliŭ masty publičnymi zajavami, što za biascenak «Biełtranshaz» nie addaść. Dyj navat u vypadku niejkaha kampramisu takoha šalona tannaha hazu ŭžo nia budzie – chacia b tamu, što jon daražeje i ŭ samoj Rasiei.

Ekanamist Leanid Zaika miarkuje, što $80 jość krytyčnaj canoju dla našych pradpryjemstvaŭ. Ekspert Valer Daškievič zaznačaje, što pry $100 rentabelnaść biełaruskaj ekanomiki stanovicca praktyčna nulavoj.

Jašče adzin ekanamist – Jarasłaŭ Ramančuk – schilny ličyć, što suvoryja imperatyvy padšturchnuć Łukašenku da ekanamičnaje liberalizacyi. Naturalna, praces budzie frahmentarny dy niepaśladoŭny, ale ž systema takaja, što tolki vytarhni adnu cahlinku...

I ŭsie eksperty sychodziacca na tym, što zaraz biełaruskaje kiraŭnictva pavinna vybirać miž kiepskimi dy vielmi kiepskimi dla siabie scenarami. Jano musić nastupać na horła ŭłasnaj pieśni, vypuskać džyna ź plaški.

U hetym sensie presinh prahnaha «Hazpromu» sapraŭdy stanovicca składnikam cisku na režym. Dasiul jon trymaŭsia na zdolnaści zabiaśpiečvać abyvatalu prymalny pavodle postsaŭkovych kryteraŭ dabrabyt. U značnaj stupieni – na košt rasiejskich preferencyjaŭ.

Zaraz resurs ułady vyhladaje chistkim jak nikoli.

Sacyjalnyja ž zabureńni, kažuć palitolahi, časta zdarajucca nie ad halečy, a ad taho, što rezka spyniajecca rost dabrabytu dy vybuchaje kryzis niaspraŭdžanych čakańniaŭ.

• 0
• 0
• 0
• 0
• 0
• 0
• 0
• 0