Za «nieadpaviednaść realijam»: u Mahilovie pieranazvali Savieckuju płošču
Pra heta ŭ pramovie pa-biełarusku abviaściŭ staršynia harvykankama.
Biez asablivaha vitańnia niekalki tysiač mahiloŭcaŭ, jakija pryjšli adznačyć aficyjny Dzień niezaležnaści na Savieckuju płošču, uspryniali viestku pra jaje pierajmienavańnie. Navinu ahučyŭ na biełaruskaj movie staršynia Mahiloŭskaha harvykankamu Uładzimier Cumaraŭ.
«Hałoŭnaje śviata krainy adznačana ŭ Mahilovie pierajmienavańniem płoščy Savieckaj u płošču Słavy, jakaja, — jak, zajaviŭ u svajoj pramovie kiraŭnik haradzkoj vykanaŭčaj vertykali, — u budučym nabudzie novy voblik i novaje admietnaje hučańnie».
Paśla praciahłaj paŭzy i cišyni Uładzimier Cumaraŭ praciahnuŭ: «Tut znojdzie svajo adlustravańnie nia tolki historyja dnia minułaha, ale i važniejšyja pracoŭnyja viechi dnia siońniašniaha». Paśla hetych słovaŭ paŭza ŭ pramovie čynoŭnika była karaciejšaj, ale z toj ža cišynioju hramady.
Kazaŭ u svajoj pramovie kiraŭnik haradzkoj vertykali pra pośpiechi ŭ ekanomicy, novyja adkrytyja abjekty dy mir i spakoj u Biełarusi. Padziakavaŭ veteranam za ichnuju pieramohu i padaryŭ mahiloŭskim pažarnikam klučy ad pažarnaj mašyny «Ford».
Pra toje, što najstarejšy plac horadu pieranazavuć Uładzimier Cumaraŭ zajaviŭ jašče miesiac tamu. Paźniej inicyjatyvu harvykankamu padtrymali bolšaściu hałasoŭ deputaty harsavietu. Jak zajaŭlałasia nia suprać byli «pracoŭnyja kalektyvy, hramadzkija arhanizacyi i prostyja žychary horadu».
Napiaredadni sesija harsavietu, na jakoj deputaty zaćviardžali rašeńnie pra pierajmienavańnie płoščy, da ich źviarnulisia pradstaŭniki hramadzkaści, abjadnanyja ŭ supołku «Hramadzki mahistrat». Prasili nie śpiašacca ź pierajmienavańniem, a pravieści miascovy referendum, na jakim vyznačyć, ci padtrymlivajuć inicyjatyvu žychary horadu. «Hramadzki mahistrat» prapanavaŭ svoj varyjant nazvy płoščy — Ratušnaja. Pra zvarot na sesii kazali, ale, jaho nie padtrymali.
Ideja pierajmienavać Savieckuju płošču ŭ płošču Słavy ŭpieršyniu była ahučanaja ŭ 2005 hodzie. U 2007-m pieranazvańnie nie padtrymali. Niečakana sioleta jaje aktualizavaŭ Uładzimier Cumaraŭ. Čynoŭnik patłumačyŭ, što novaja nazva płoščy, jak jon vykazaŭsia, «prosicca»: «Pierajmienavać Savieckuju płošču ŭ płošču Słavy, jakoj jana pavinna być. Takaja nazva płoščy prosicca, — kazaŭ Cumaraŭ. Tłumačeńni inšych čynoŭnikaŭ zvodziłasia da taho, što savieckaja nazva płoščy nie adpaviadaje siońniašnim realijam.
Prychilniki idei pierajmienavańnia Savieckaj płoščy ŭ Ratušnuju davodzili, što daminantaj na placy źjaŭlajecca Ratuša, a nie manument baraćbitam «Za Savieckuju ŭładu». Na ichnuju dumku, nazva Ratušnaja neŭtralnaja i nie adyjoznaja.
U roznyja časy i epochi płošča nasiła roznyja nazvy. Za časami mahdeburskaj volnaści jana była Handlovaj. Kali pryjšli rasiejcy, stała Hubernatarskaj, paźniej Dumskaj. Za balšavikami — Płoščaj Svabody. Paśla Druhoj usiaśvietnaj vajny stała Savieckaj.
Kamientary