Biełaruskija dypłamaty pavinny šukać pierśpiektyŭnych partnioraŭ u roznych rehijonach śvietu, kab raźvivać ź imi takoje ž supracoŭnictva, jak ź Vieniesuełaj. Pra heta zajaviŭ siońnia Alaksandr Łukašenka na naradzie z kiraŭnikami dypłamatyčnych pradstaŭnictvaŭ i konsulskich ustanoŭ Biełarusi.
«Mała chto vieryŭ u pośpiech maštabnaha krainavaha prajekta pad nazvaj «Vieniesueła». Ale my dakazali, što možam na inšym paŭšarji vykonvać najskładaniejšyja techničnyja zadačy. Vopyt, nabyty «kryvioj i potam» u Vieniesuele, treba vykarystoŭvać u inšych rehijonach. Treba šukać i znachodzić svaje «vieniesueły» ŭ Azii, Afrycy, dyj u toj ža Łacinskaj Amierycy», — cytuje Łukašenku dziaržaŭnaje ahienctva BiełTA.
Va ŭmovach adkrytaj, aryjentavanaj na ekspart ekanomiki Biełarusi jaje źniešnieekanamičny składnik maje klučavoje značeńnie, padkreśliŭ jon. «Załoh stabilnaści krainy ŭ tym, jak my spracujem na źniešnich rynkach, a pośpiech źniešnieekanamičnaj dziejnaści zaležyć ad uzhodnienych dziejańniaŭ usiaho realnaha siektara ekanomiki», — zajaviŭ kiraŭnik dziaržavy.
Zaznačyŭšy, što biełaruskim eksparcioram davodzicca kankuryravać ź viadučymi zamiežnymi kampanijami i transnacyjanalnymi karparacyjami, Łukašenka skazaŭ: «Značyć, treba šukać svaje nišy, dzie biełaruskaja pradukcyja była b zapatrabavanaja. Tam, dzie my hetyja nišy znachodzim, u tym liku i z dapamohaj pasolstvaŭ, naša technika i inšyja tavary vysoka ceniacca i niamała kaštujuć. Zafiksavanyja navat fakty padrobak biełaruskich brendaŭ».
Na dumku kiraŭnika dziaržavy, sučasnaja źniešniaja palityka Biełarusi pavinna być pramym uvasableńniem formuły «dypłamatyja — heta majsterstva mahčymaha». «Ale nie ŭ sensie «adpačyvać na łaŭrach» abo «spać u šapku», apraŭdvajučysia źniešnimi niespryjalnymi ŭmovami. Nieabchodna stavić maksimalnyja mety, pryčym na ŭsich kirunkach. I tolki tady možna raźličvać na niejki prymalny vynik», — padkreśliŭ Alaksandr Łukašenka.
Kamientary