— Taćciana, Vy zrabili toje, čaho nichto raniej nie rabiŭ — abviaścili zbor srodkaŭ na stvareńnie dobraachvotnickaha zbrojnaha bataljona Pahonia. Jon maje vajavać za niezaležnaść Ukrainy. Ci jość vodhuk?
— Tak, vodhuk jość, i takoha kštałtu padtrymka maje pieradusim simvaličnaje značeńnie. Ludzi pačali pieraličvać srodki litaralna praz hadzinu ad publikacyi rachunkaŭ u internecie. Adnak ja nie mahu skazać, što sabranaja niejkaja vieličeznaja suma. Tranzakcyj niašmat, achviaravańni ŭ dyjapazonie ad 10 da 100 dalaraŭ. Ukraincy, naprykład «Nacyjanalny Aljans», taksama akazali istotnuju dapamohu. Biełarusam, jakija znachodziacca va Ukrainie i čakajuć adpraŭki ŭ trenirovačny łahier i zonu ATA, dali žyllo, pobytavyja rečy, častku vajskovaj amunicyi.
— Adkul pieravažna achviarujuć i chto (u sacyjalnym razrezie)?
— Pieravažna heta biełarusy, što pražyvajuć za miažoj. Heta Polšča, Litva, ZŠA, Vialikabrytanija. Taksama jość niekalki pieravodaŭ z ułasna Biełarusi. Kali kazać pra znajomyja mnie imiony, dyk heta davoli paśpiachovyja biełarusy, jakija tym ci inšym čynam anhažavanyja ŭ biełaruskija spravy.
— Aprača zboru achviaravańniaŭ, jakaja Vaša rola ŭ «Pahoni», jak Vy tudy trapili?
— Pra heta ŭžo źjavilisia insinuacyi, i zrazumieła, kamu vyhodna raspaŭsiudžvać brud i chłuśniu. Farmalna ja nie ŭvachodžu ŭ dobraachvotnicki bataljon, ale dapamahaju «Pahoni» ŭ roznych aśpiektach. U dadzieny momant znachodžusia ŭ Vilni, damaŭlajusia nakont akazańnia padtrymki našym ludziam i ich siemjam u vypadku imaviernaha pieraśledu z boku KDB.
Ja zdaŭna anhažavana va ŭkrainskija spravy, i padčas apošniaha Majdanu i dalejšych padziejaŭ da mianie źviartałasia bahata biełarusaŭ z pytańniem, jak dapamahčy Ukrainie. Pa mahčymaści nakiroŭvała ich da arhanizacyj, jakija zajmajucca vałanciorskaj padtrymkaj - «Majdan SOS» i t.p. Hetaj viasnoj da mianie źviarnulisia niekalki maich siabroŭ, jakaja vystupili ź idejaj stvareńnia asobnaha biełaruskaha dobraachvotnickaha farmavańnia i prapanavali dałučycca. Ja pahadziłasia, bo liču za honar zrabić svoj maleńki ŭniosak u supolnuju spravu. Inšy momant – heta toje, što «Pahoni» byŭ patrebny aficyjny publičny kantakt ź liku biełarusaŭ. Majo imia dastatkova dobra pasavała da hetaje roli, bo mnie daviarajuć ludzi i ja, u adroźnieńnie ad astatnich, nie znachodžusia pad pramym udaram śpiecsłužbaŭ, bo pražyvaju za miežami Biełarusi.
— Na sajcie Biełultras pisali — praŭda toje ci ŭkid, — što ludziej, jakija ź Biełarusi adpraŭlajuć zajaŭku na ŭdzieł u Pahoni na raźmieščany ŭ siecivie mejł, nieŭzabavie vyklikajuć na razmovu ŭ adździeł pa baraćbie z arhanizavanaj złačynnaściu. Pejpał [płaciežnaja sistema, praź jakuju źbirajucca achviaravańni] tak prasačyć niemahčyma, Vy dumajecie?
— Adnosna taho, što ludziej vyklikali ŭ siłavyja orhany. Ja nie zajmajusia naboram ludziej u «Pahoniu», ale my z kalehami abmiarkoŭvali źjaŭleńnie hetaj infarmacyi ŭ internecie. Schilajusia da mierkavańnia, što ludzi patrapili pad pilny nahlad śpiecsłužbaŭ praz aktyŭnaść u sacyjalnych sietkach, a nie tamu, što pošta była ŭzłamanaja. Na tym ža Vkontakte niekatoryja karystalniki ŭ adkrytuju pišuć, što vielmi cikaviacca «Pahoniaj» i chočuć ustupić u šerahi dobraachvotnikaŭ.
Što tyčycca pejpału, tranzakcyi adsačyć ciažka. Tym nie mienš, va ŭmovach pražyvańnia va ŭmovach dyktatury, dzie internet filtrujecca, a adno tolki słova « supraciŭ» vyklikaje ŭ KDB prystup isteryki, navat dziesiacidołaravy pieravod na «niapravilny» rachunak niasie ryzyku. I heta treba vielmi surjozna ŭśviedamlać. Pry siońniašnim uzroŭni raźvićci technałohij uzłamać abo adsačyć možna ŭsio: poštu, skajp, telefon, i hetak dalej. Pytańnie tolki ŭ tym, kolki času i srodkaŭ śpiecsłužby hatovyja na heta vydatkavać.
— Jak treba razumieć, i ŭ atradzie «Pahonia», i ŭ zbory srodkaŭ na jaho rej viaduć biełarusy-emihranty. Jakaja moža być rola biełaruskaj emihracyi siońnia, va ŭkrainskich padziejach i šyrej?
— Karotka kažučy, heta padtrymka ludziej, jakija robiać spravu na miescy (va Ukrainie, Biełarusi). Heta typovyja rečy, jakimi zajmajucca dyjaspary luboj krainy — nie varta vydumlać niečaha novaha. Padtrymka finansavaja, infarmacyjnaja, łabisckaja, arhanizacyja akcyj salidarnaści. Viadoma, što hetaja sprava mahła b być šmat bolš efiektyŭnaj pry najaŭnaści adekvatnaj instytucyjanalnaj arhanizacyi. Na siońnia bolšaść biełaruskich strukturaŭ za miažoj majuć tyja samyja «spradviečnyja chvaroby», što i apazicyjnyja struktury ŭnutry Biełarusi – baraćba za pasady i hranty, bytavyja svarki miž svaimi ž. Čaho varty tolki apošni kanflikt u najbujniejšaj arhanizacyi biełarusaŭ ZŠA, kali adzin z čalcoŭ arhanizacyi padaje na inšych u sud!
— Čamu dla Vas važna dapamahać Ukrainie?
— Tamu što nie mahu inakš. Usie prystojnyja ludzi abaviazanyja siońnia być na baku ŭkrainskaha naroda i rabić maksimum ad ich zaležnaha. Heta taja situacyja, dzie treba vybrać adnaznačna: ty za «biełych» ci za «čyrvonych». Ty za svabodu, spraviadlivaść, cyvilizacyju ci ty za HUŁAH, nianaviść i chamstva. Niemahčyma stajać u baku chavajučysia za abjektyvisckaj pazicyjaj naziralnika ŭ toj čas, kali ŭ XXI stahodździ, u centry Jeŭropy adbyvajecca adkrytaja ahresija suprać niezaležnaj dziaržavy, usia «vina» jakoj składajecca ŭ tym, što jaje narod lubić svabodu bolej, čym kaŭbasu.
