Siaredni košt budaŭnictva žylla ź dziaržaŭnaj padtrymkaj u pieršym kvartale 2014 hoda składaŭ 6,6 młn rubloŭ za kvadratny mietr, paviedamiŭ načalnik upraŭleńnia žyllovaj palityki Ministerstva architektury i budaŭnictva Alaksandr Horval 23 lipienia na pres-kanfierencyi ŭ Minsku.
«Ale tudy ŭvajšli i damy, jakija zdadzienyja pa 12 młn rubloŭ za mietr, i damy, jakija zdadzienyja za 4 młn rubloŭ. A ŭsie novyja dahavory zaklučajucca pa aktualnych cenach. Tamu ničoha niama dziŭnaha, kali ciapier havorać pra 9, 10, 12 młn rubloŭ za kvadratny mietr pry zaklučeńni dahavoraŭ», — skazaŭ jon.
Horval adznačyŭ, što rostu cen na budaŭnictva žylla jość abjektyŭnyja pryčyny, pryčym treba brać da ŭvahi rost cen u rublach, a nie ŭ dołarach.
«U nas jość skažonaje ŭjaŭleńnie pra bałansiroŭku źmieny vartasnych paramietraŭ u rublach i dołarach. Heta niesupastaŭnyja rečy. Biełaruskija rubli — heta abjektyŭnaja realnaść, a dołar — štučnaja pabudova. Treba paraŭnoŭvać u biełaruskich rublach», — skazaŭ jon.
Pavodle słoŭ Horvala, rost cen adbyvajecca prosta: «Inflacyja nam viadomaja, vyniki ekanamičnaj dziejnaści, blizkija da nulu pryrostu, nam viadomyja, rost zarabotnaj płaty dzieści adbyvaŭsia i taksama nacisnuŭ na inflacyju schavanuju i hetak dalej».
Akramia taho, skazaŭ jon, «mietodyka indeksacyi ŭ budaŭnictvie źmianiłasia, stała bližejšaj da realij, bo raniej indeksy budmantažu ŭstanaŭlivalisia valavym sposabam, kab strymlivać košt». «Ciapier indeksy padraśli. Usio heta pryviało da taho, što cana budaŭnictva raście», — paviedamiŭ jon.
