Chto staić za biasčynstvami na ŭschodzie Ukrainy?
Niadaŭna «NN» pryjšoŭ nastupny list: «Šanoŭnaja Redakcyja! Zrabicie artykuł, u jakim raźmiaścicie foty pradstaŭnikoŭ kiraŭničych kołaŭ «DNR» i «ŁNR», kab ludzi pabačyli ichnyja tvary», — napisaŭ čytač Illa Paraskievič.
Sapraŭdy, cikava, što za ludzi «zmahajucca za niezaležnaść» ukrainskich abłaściej?
Užo niekalki miesiacaŭ ich nie mohuć vyturyć z zaniatych miescaŭ dy vyzvalić terytoryju. Kali krychu kapnuć bijahrafii dziejačaŭ, to bačna, što amal usie jany — z Rasii. Heta razburaje mif, što zmahajucca sami ŭkraincy.
U Daniecku 11 lipienia prajšło viasielle «palavoha kamandzira» Arsiena Paŭłava (mianuška — Mataroła) ź dziaŭčynaj Alenaj. Važnym atrybutam strojaŭ maładych była zbroja.
Mataroła — 30-hadovy ŭradženiec Respubliki Komi Rasii. Słužyŭ u marskoj piachocie, braŭ udzieł u antyterastyčnych apieracyjach u Čačni. Za abaronu Słavianska ŭznaharodžany «Hieorhijeŭskim kryžam DNR». U internecie žartavali, što heta nahadvała scenu ź filma «Viasielle ŭ Malinaŭcy». Chaj by i ažaniŭsia, ale na radzimie ŭ jaho ŭžo jość žonka i dzicia.
Alaksandr Mažajeŭ, ci, jak jaho čaściej nazyvajuć, Kazak Babaj. Heta nie stary dzied, Mažajevu ŭsiaho 36 hadoŭ. Prosta imidž taki.
Jon rodam z Rasii, z Krasnadarskaha kraja, aktyŭny ŭdzielnik kazackaha ruchu. U Rasii znachodzicca ŭ fiederalnym vyšuku za sprobu zabojstva, što i było hałoŭnaj pryčynaj pajechać spačatku ŭ Krym, a paśla — na ŭschod Ukrainy. Pa niekatorych źviestkach, Mažajeŭ braŭ udzieł va ŭzbrojenym kanflikcie ŭ Hruzii ŭ 2008 hodzie. U pačatku lipienia, kali ŭkraincy ŭdaryli pa Słaviansku, Kazak Babaj dezierciravaŭ i ciapier niedzie chavajecca.
Ihar Bieźler («Bies ) — padpałkoŭnik rasijskaj armii ŭ adstaŭcy. Udzielničaŭ u afhanskaj vajnie. Niekalki hadoŭ tamu jon byŭ zvolnieny ŭ zapas. Prynamsi, była lehienda, što zvolniŭsia. Pierajechaŭ žyć u Horłaŭku, vałodaŭ pradpryjemstvam rytualnych pasłuh.
Mienavita hrupa na čale ź Bieźleram ździejśniła napad na kałonu ŭkrainskich vajskoŭcaŭ pad Vałnavachaj, dzie zahinuła 16 čałaviek. Jon byŭ siarod arhanizataraŭ zabojstva deputata Horłaŭskaj miascovaj rady Rybaka, jakomu ŭsparoli žyvot i žyvym patapili. Sprabavaŭ zachapić uładu ŭ Daniecku, ale stul jaho vybili.
Ihar Strałkoŭ-Hirkin — ministr abarony «DNR». Naradziŭsia ŭ Maskvie, prachodziŭ słužbu va ŭzbrojenych siłach Rasii. Pisali, što jon pałkoŭnik HRU, sam jon śćviardžaje, što słužyŭ u FSB.
Jahonaje chobi — vajskovaja rekanstrukcyja i historyja Biełaha ruchu — vadziła jaho ŭ šmatlikija padarožžy. Vajavaŭ u Prydniastroŭi, Bośnii i Čačni. Pa infarmacyi Bi-bi-si, apošnim miescam pracy Hirkina było ŭpraŭleńnie pa baraćbie ź mižnarodnym teraryzmam FSB.
Alaksandr Baradaj — premjer-ministr «DNR».
Rasijski palitołah i žurnalist, jaki pracavaŭ razam sa Strałkovym u Dahiestanie i Čačni ŭ 1999, što moža być arhumientam jahonaj prynaležnaści da FSB taksama.
Siarhiej Zdryluk — namieśnik kamandujučaha ŭzbrojenych siłaŭ «DNR». Mianuška — Abvier.
Adzin ź niešmatlikich ukraincaŭ siarod lidaraŭ bajevikoŭ. Usio śviadomaje žyćcio pražyŭ u Krymie i žanaty z ruskaj žančynaj. Aficer vajskovaj vyviedki SBU ŭ adstaŭcy.
Pavieł Hubaraŭ — «narodny hubiernatar Danieckaj vobłaści», kiraŭnik «Narodnaha apałčeńnia Danbasa».
Rodam ź Sievieradaniecka, byŭ aktyŭnym udzielnika nieafašysckaj arhanizacyi «Ruskaje nacyjanalnaje adzinstva». Byŭ aryštavany ŭkrainskimi śpiecsłužbami, ale ŭ vyniku abmienieny na pałonnych supracoŭnikaŭ SBU. U palityčnych pohladach nazyvaje siabie prychilnikam Uładzimira Pucina, a taksama palityčnych ładaŭ Biełarusi, Vieniesueły i carskaj Rasii.
Valeryj Bołataŭ — kiraŭnik «ŁNR». Braŭ udzieł u bajavych dziejańniach u «haračych kropkach» — Tbilisi, Jerevan, Nahorny Karabach.
Pavodle źviestak Słužby biaśpieki Ukrainy, Bołataŭ uvajšoŭ u skład sfarmavanaj FSB i HRU dyviersijnaj hrupy, pierad jakoj «stavilisia zadačy zboru raźviedvalnaj infarmacyi ab raźmiaščeńni i pieradysłakacyi ŭkrainskich vajskovych častak, radyjołakacyjnych stancyj, arhanizacyja teraktaŭ, błakiroŭki vajennych kałon».
Kamientary