Homielski abłasny sud 31 lipienia vynies pryhavor 55-hadovamu žycharu horada, jaki abvinavačvaŭsia ŭ zabojstvie žonki. Hamialčanin pryhavorany da 17 hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu.
Jak paviedamiła BiełaPAN prakuror adździeła prakuratury Homielskaj vobłaści Taćciana Rodnieva, mužčyna na praciahu troch dzion — z 9 pa 11 listapada 2013 hoda žorstka źbivaŭ svaju žonku, što pryviało da jaje śmierci. Žančynie 1960 hoda naradžeńnia jon nanios 105 udaraŭ, biŭ jaje kułakami, mietaličnaj nožkaj ad kresła, mietaličnaj častkaj ad pyłasosu. Źbivaŭ z takoj siłaj, što pry ahladzie trupa vyśvietliłasia, što ŭ achviary adarvanyja vušy. Pakoj u domie byŭ u kryvi. Pavodle słoŭ susiedziaŭ i darosłaj dački zahinułaj, mužčyna i raniej biŭ žonku, jana nieadnarazova chadziła ź siniakami, ale ŭ milicyju nie źviartałasia.
Na sudzie abvinavačvany poŭnaściu admaŭlaŭ svaju vinu. Śćviardžaŭ, što ŭdaryŭ žonku tolki raz, kinuŭšy joj u śpinu taburetku za toje, što nie pryhatavała jamu pajeści. Pavodle jaho słoŭ, viarnuŭšysia z pracy, ubačyŭ, što žonka źbitaja, vyklikaŭ chutkuju dapamohu. Ale na momant prybyćcia chutkaj žančyna była miortvaja, pryčym ekśpiertyza pakazała, što śmierć nastupiła za niekalki hadzin da pryjezdu miedykaŭ.
Pa pakazańniach śviedak, muž i žonka ŭdvaich złoŭžyvali śpirtnymi napojami. Muž patrabavaŭ ad žonki, kab u domie zaŭsiody byŭ paradak, pryhatavanaja ježa da jaho prychodu, u vypadku ž «niepasłuchmianaści» źbivaŭ žančynu.
Abvinavačvany raniej nie byŭ sudzimy, pracavaŭ ślesaram na adnym z pradpryjemstvaŭ Homiela.
