Straty ad niepravamiernych dziejańniaŭ słužbovych asob Słuckaha syrarobnaha kambinata aceńvajucca ŭ Br17,5 młrd, paviedamili ŭ pres-słužbie Kamiteta dziaržkantrolu Biełarusi.
Pa vynikach pravierki ŭpraŭleńnia Departamienta finansavych rasśledavańniaŭ KDK pa Minskaj vobłaści i Minsku sumiesna z KDB Biełarusi i upraŭleńniem SK pa Minskaj vobłaści ŭ dačynieńni da hienieralnaha dyrektara AAT «Słucki syrarobny kambinat» i dyrektara Kapylskaha filijała pradpryjemstva raspačata kryminalnaja sprava.
U chodzie śledčaj pravierki ŭstanoŭlena, što jašče ŭ 2012 hodzie Słucki syrarobny kambinat i jaho filijały pastaŭlali pradukcyju na ŭmovach stoadsotkavaj pieradapłaty rasijskamu pradpryjemstvu. Potym pakupniku była pradastaŭlenaja adterminoŭka płaciažu, ale ź listapada 2012 hoda pakupnik pierastaŭ raźličvacca za pastaŭlenuju pradukcyju.
Pry hetym słužbovyja asoby AAT nie tolki nie spynili adpuskać pradukcyju daŭžniku, ale i dali adterminoŭku płaciažu na bolš praciahły termin.
U vyniku, da kanca 2012 hoda ŭtvaryłasia praterminavanaja zapazyčanaść, kraina niedaatrymała valutu ŭ sumie 28 młn rasijskich rubloŭ.
Viedajučy ab niehatyŭnaj dla biełaruskaha vytvorcy situacyi, słužbovyja asoby zaklučyli dahavor na anałahičnych umovach i na 2013 hod i praciahnuli adpuskać pradukcyju ŭ Rasiju.
Akramia taho, dla ŭtojvańnia zapazyčanaści, jakaja ŭtvaryłasia słužbovyja asoby pradpryjemstva zaklučali z rasijskim pakupnikom dadatkovyja pahadnieńni na padaŭžeńnie terminu apłaty, čym faktyčna vyzvalali daŭžnika ad raniej ustanoŭlenych terminaŭ raźliku. Usie rašeńni prymalisia słužbovymi asobami AAT «Słucki syrarobny kambinat» u parušeńnie patrabavańniaŭ zakanadaŭstva, jakoje abmiažoŭvaje paŭnamoctvy słužbovych asobaŭ pradpryjemstva i ŭstanaŭlivaje paradak pryniaćcia rašeńniaŭ ab pastaŭkach pradukcyi za miežy Biełarusi.
