Rasija budzie dabivacca ad Biełarusi zabarony polskich jabłyk

Raśsielhasnahlad budzie prasić Biełaruś ab uviadzieńni zabarony na impart polskaj harodniny i sadaviny.

Pra heta ahienctvu «Biznes-naviny» paviedamiŭ pres-sakratar rasiejskaj ustanovy Alaksiej Alaksiejenka.

«My ŭtvarajem adnuju mytnuju prastoru, tamu ryzyki dla ŭsich adnolkavyja. My možam čakać toje, što polskija biznesoŭcy buduć staracca hetuju ž pradukcyju pastaŭlać praz trecija krainy pad vyhladam miascovaj pradukcyi», — skazaŭ Alaksiejenka.

30 lipienia Raśsielhasnahlad raspaŭsiudziŭ paviedamleńnie ab uviadzieńni časovych abmiežavańniaŭ na ŭvoz u Rasieju z Polščy jabłykaŭ, ihrušak i ajvy (kod TN ZED 0808), abrykosaŭ, višniaŭ i čarešniaŭ, piersikaŭ, niektarynaŭ, ślivak (kod TN ZED 0809), kapusty (kod 0704), inšaj harodniny (kod TN ZED 0709).

Pryčynaj uviadzieńnia abmiežavańniaŭ Raśsielhasnahlad nazyvaje kompleks ryzyk, źviazanych z vyjaŭleńniem u polskaj pradukcyi karancinnych dla Rasiei abjektaŭ, u pryvatnaści, zachodniaha kalifarnijskaha (kvietkavaha) trypsa (Frankliniella occidentalis Perg.) i ŭschodniaj pładažerki (Grapholitha Molesta Busck).

Adnak nichto nie maje iluzij: takim čynam Rasija sprabuje pakarać Polšču za aktyŭnuju padtrymku Ukrainy. Raniej Polšča pastaŭlała ŭ Rasiju sadaviny j harodniny na 400 miljonaŭ dalaraŭ štohod. Polskija sadavody pieradavyja ŭ śviecie, u krainie vyrastajuć cudoŭnyja jabłyki.

Raniej Rasija anałahična zabaraniała impart biełaruskaha małaka, hruzinskaj minieralnaj vady, małdaŭskaha vina j vinahradu. Ciapier pad zabaronu trapili ŭkrainskija pradukty tatalna. Choć usio heta jakasnaja pradukcyja, jakaja na paradak lepšaja za mnohija rasijskija anałahi.

Dyrektar DU «Hałoŭnaj dziaržaŭnaj inśpiekcyi nasieńniavodstva, karancinu i achovy raślin» Leanid Plaško paviedamiŭ, što biełaruski bok pakul nie atrymaŭ ad Rasiei infarmacyi ab uviadzieńni zabarony na ŭvoz pradukcyi raślinavodstva z Polščy.

«U nas vielmi šmat tranzitnych hruzaŭ idzie z Polščy ŭ Rasieju. Heta prykładna 1 młn ton jabłykaŭ u hod. A inšaj pradukcyi jašče proćma. Kali b takaja zabarona rasiejskim bokam była ŭviedzienaja, u mianie byŭ by aficyjny dakumient z prośbaj, kab na pamiežnym pierachodzie na miažy Mytnaha sajuza nie puskali ŭ Rasieju peŭnyja hruzy. Ale hetaha dakumienta pakul niama», — skazaŭ Plaško.

Plaško nie zdoleŭ adkazać na pytańnie, ci budzie biełaruski bok uvodzić zabaronu na pastaŭki polskaj pradukcyi, kali pra heta paprosić Rasieja. Raniej Biełaruś admoviłasia iści ŭ farvatery Rasii ŭ pytańni zabarony na ŭkrainskija tavary.

Pavodle źviestak Biełstata, Polšča źjaŭlajecca najbujniejšym pastaŭščykom u Biełaruś harodniny i sadaviny.

U pryvatnaści, u studzieni-traŭni 2014 hoda impart jabłykaŭ i hruš u Biełaruś z Polščy skłaŭ 190 tysiač ton, što na 67% bolš, čym za piać miesiacaŭ 2013 hoda. U vartasnym vyrazie impart hetaj pradukcyi vyras na 75% da USD 93,0 młn. Dola Polščy ŭ ahulnym abjomie impartu jabłykaŭ, ihrušaŭ i ajvy ŭ vartasnym vyrazie za piać miesiacaŭ 2014 skłała 75,1%.

• 0
• 0
• 0
• 0
• 0
• 0
• 0
• 0