Šrajbman dapuskaje achałodžvańnie adnosin pamiž Łukašenkam i Pucinym
«My ŭžo bačym, jak vajennaja madel adnosin dla Łukašenki pierastaje pracavać tak, jak jana pracavała dva hady tamu».
Analityk Arciom Šrajbman parazvažaŭ pra adnosiny Łukašenki i Pucina ŭ novym vypusku jutub-kanała «Hadzińničak cikaje».
«Ja nie dumaju, što my znachodzimsia ŭ zonie stabilnaści, pakul idzie vajna. Jany mohuć zastacca da kanca vajny ŭ hetym «miadovym miesiacy», ale my ŭžo bačym, jak vajennaja madel adnosin dla Łukašenki pierastaje pracavać tak, jak jana pracavała dva hady tamu», — davodzić jon.
Pa słovach analityka, u dalejšym, kali Rasija i ZŠA dasiahnuć niejkich sieparatnych pahadnieńniaŭ, navat pry ŭmovie zachavańnia jeŭrapiejskich sankcyj Maskva zmoža zarablać hrošy na eksparcie nafty i hazu ŭ niejeŭrapiejskija krainy. Što tyčycca Biełarusi, to, jak adznačaje Šrajbman, pierśpiektyvy rostu biełaruskaha ekspartu ŭ Rasiju amal vyčarpanyja:
«Prosta tamu, što rasijskaja ekanomika astyvaje, kankurencyja raście z kitajskimi i inšymi vytvorcami. Niezrazumieła, adkul uziacca novaj krynicy hetaha «załatoha daždžu», jaki abrynuŭsia na Łukašenku ŭ apošnija paru hadoŭ, navat da siaredziny 2024 hoda».
Jak adznačajeie Šrajbman, užo bačna, što Łukašenka prosić novyja źnižki na naftu, tamu što biełaruskija NPZ zastajucca stratnymi, prosić pašyryć mahutnaści rasijskaj čyhunki dla taho, kab prapuskać bolš biełaruskich tavaraŭ, šukaje novyja kredytnyja mahčymaści. Pakul ža jamu dajuć tolki rasterminoŭku pa starych.
«Ja baču, što z zony kamfortu my pastupova vychodzim, navat u miežach vajny. (…) My ŭžo ŭvachodzim u zonu bolš zvykłuju, kali ŭžo davodzicca tarhavacca, kali ŭžo davodzicca prasić, davodzicca niečym adčuvalnym sastupać. (…) Daviadziecca niejkija niekamfortnyja sastupki albo davać, albo ž naadvarot sprabavać chedžyravać (šukać alternatyvy. — NN), sprabavać vychodzić na inšych partnioraŭ, sprabavać niešta ekśpierymientavać z Zachadam, što stvaraje ŭ svaju čarhu patencyjał napružanaści z Rasijaj».
Šrajbman dapuskaje, što paśla vajny Łukašenka i Pucin zaklučać niejkuju novuju ździełku ab paramietrach svaich adnosin, novyja «darožnyja karty». Ale jon papiaredžvaje, što niedaaceńvajecca ŭpłyŭ šoku ad zakančeńnia vajny. Rasija pieraaryjentavała svaju ekanomiku, i viartańnie budzie traŭmatyčnym.
Ci budzie Rasija ŭličvać intaresy Łukašenki va ŭmovach pierabudovy svajoj ekanomiki? Kali navat ciapier jany ŭličvajucca nie poŭnaściu, i jamu davodzicca tarhavacca, to ŭ stresavaj situacyi paśla vajny moža być jašče horš. Pryjdziecca znoŭ tarhavacca, ale ź mienšaj harantyjaj pośpiechu.
Ciapier čytajuć
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca1515
Kamientary