U internecie źjaviłasia videa, źniataje 5 žniŭnia na parkoŭcy budaŭničaha hipiermarkieta «Maciaryk». U im pakazana, jak minčanin pasprabavaŭ pahutaryć z «łachatronščykami».
Spačatku ŭ kadry źjaŭlajecca sumniŭnaha vyhladu čałaviek, jaki sprabuje pradać aŭtaru videa nibyta płanšet Samsung, nabyty ŭ Varoniežy. Na samaj spravie dievajs apynuŭsia kitajskaj padrobkaj, što aŭtar videa adrazu zrazumieŭ. Pačuć u kadry canu, jakuju paprasiŭ «pradaviec», na žal, nie ŭdałosia. Apieratar prosić pakazać płanšet ŭ kamieru, adnak «pradaviec» uciakaje, zabraŭšy z saboj hadžet.
«Daj uhadaju! Kitaj, 30 dalaraŭ pa zakupcy, a to i 15!» — kaža minčanin za kadram. «Pradaviec» chavaje płanšet u pakiet i sprabuje syści, paŭtarajučy, što minčuk «nienarmalny».
«Chto vam hetyja płanšety pastaŭlaje?», - pytajecca minčanin i čuje ŭ adkaz: «Mahazin!» «Jaki mahazin?» - «Zvyčajny!». «Horad Varoniež, «Jeŭrasieć»? Pakažycie vaš ček!» — praciahvaje nasiadać apieratar, i tut u kadry źjaŭlajecca kaŭkaziec, jaki prymušaje vyklučyć kamieru, pahražajučy aŭtaru videa. «Heta značyć, vy najmajecie voś takich ludziej, tak? Adkul pryjechali? » — pytajecca minčanin. «Ty sabie prablem chočaš? Ja zaraz niekudy pazvaniu!» — kaža kaŭkaziec. Minčuk nie hublajecca: «U mianie taksama jość telefon! 102, chočaš, śledčamu pazvaniu?» Na hetym videa abryvajecca. U kamientary pad videa jaho aŭtar paviedamiŭ, što «pradaŭcy» sieli ŭ «Ładu» z rasijskimi numarami 123-ha rehijona (Krasnadarski kraj) i źjechali z parkoŭki.
