Ministerstva achovy zdaroŭja maje namier «razhruzić» školnyja zaplečniki i skaracić prodaž sasisak u cieście
Heta praduhledžana pastanovaj Ministerstva achovy zdaroŭja №63 ad 29 lipienia hetaha hoda, paviedamlaje BiełTA.
Pavodle dakumienta, masa štodzionnaha kamplekta padručnikaŭ ź piśmovymi pryładami (biez masy ranca ci zaplečnika) pavinna być źnižana dla navučencaŭ III—IV kłasaŭ — da 2 kh, V—VI kłasaŭ — 2,5 kh, VII—VIII kłasaŭ — 3 kh, IX—XI kłasaŭ — 3,5 kh. Pry hetym masa pustoha zaplečnika dla navučencaŭ małodšych kłasaŭ pavinna składać nie bolš za 700 h, dla siarednich i starejšych kłasaŭ — da 1 kh.
«Kali sioleta byŭ praviedzieny kantrol masy taho, što prynosiać u škołu, akazałasia, što masa partfielaŭ u šerahu vypadkaŭ nie adkazvała patrabavańniam — časta z-za najaŭnaści dadatkovych pradmietaŭ, nie źviazanych z navučalnym pracesam», — raspaviali ŭ Respublikanskim centry hihijeny, epidemijałohii i hramadskaha zdaroŭja.
Vahu školnaha partfiela musiać kantralavać jak baćki, tak i nastaŭniki.
Akramia taho, u škołach prapanujecca arhanizavać dadatkovyja miescy, kab dzicia mahło pakidać tam takija pradmiety, jak nabor farbaŭ, albom, školnuju formu.
Dakumient praduhledžvaje vykarystańnie va ŭstanovach śpiecyjalnaj adukacyi fasavanaj ŭ jomistaści niehazavanaj pitnoj vady pramysłovaj vytvorčaści, abo vady z centralizavanaj vodapravodnaj sistemy paśla jaje ačyščeńnia praz łakalnyja filtry pramysłovaj vytvorčaści, abo kipiačonaj vady. Pry hetym kipiačonaja vada pavinna zachoŭvacca ŭ zakrytych jomistaściach z vodarazbornym kranam abo ŭ hrafinach na praciahu nie bolš jak 4 hadzin.
Z metaj zrabić racyjon bolš raznastajnym u bufiecie abmiažoŭvajecca realizacyja niekatorych vysokakałaryjnych mučnych straŭ (picy, smažanak, sasisak u cieście). Ich možna budzie hatavać nie bolš jak dva razy na tydzień.
Pavinny być zabiaśpiečanyja ŭmovy dla padahrevu kulinarnych vyrabaŭ. U jakaści «ahulnaŭmacalnaha praduktu» ŭ asartymient bufietaŭ uviedzieny hiematahien, ale nie čaściej jak dva razy za vučebny tydzień.
Pradukty z vostrym smakam (chren, pierac čyrvony i čorny, harčyca, stałovy vocat) taksama buduć pad zabaronaj.
Vostry pierac u recepturach zamianiajecca piatruškaj, sielderejem, kropam, cybulaj, časnykom, karycaj, a stałovy vocat — cytrynavaj kisłatoj.
Kamientary