Narodzie, nahadajem, što na «Našaj Nivie» možna kamientavać. Voś jakija miechanizmy biaśpieki
My zakryli kamienty ŭvosieni 2020 hoda, bo pradbačyli patencyjnyja prablemy dla kamientataraŭ. U 2022-m adnavili — ale ŭ inšym techničnym rašeńni.
Adnaŭlajem, bo adčuvajem u ludziej žadańnie vykazvacca. Va ŭmovach, kali mnohija nie mohuć dazvolić sabie adkryta vykazacca ŭ svaich sacsietkach, jość patreba vykazvacca ananimna. Patrebnaja placoŭka, dzie ludzi mahli b havaryć nie tolki z kołam siabroŭ.
Adnaŭlajem my kamientavańnie tak, kab niemahčyma było adsačyć, chto kamientuje. Voś jak heta arhanizavana.
- Kali vy zachodzicie ź biełaruskaha aj-pi ci kali vy zachodzicie na lusterka «Našaj Nivy», forma dla kamientaroŭ vam prosta nie pakazvajecca, nie možacie vy i łajkać, možacie prosta čytać kamienty. Vy zmožacie pakinuć kamientar tolki zachodziačy ź Biełarusi praz VPN abo z-za miažy. Takim čynam, nichto nie zmoža, navat vypadkova, navat pa ŭłasnaj pamyłcy, pastavić kamient ź biełaruskaha aj-pi.
- Imia karystalnika nie budzie zachoŭvacca, rehistracyja nie patrabujecca. Jak tolki vy pasłali kamient i vyjšli sa staronki z artykułam, forma aŭtamatyčna ačyščajecca. Heta budzie mieć advarotnym bokam — časam, patencyjna — błytaninu ź nikami. Maderatar pastarajecca minimizavać takija vypadki.
- Dakładny čas publikacyi kamientaroŭ nie budzie adlustroŭvacca, kab kamientatara nie mahli vyličyć pa časie publikacyi.
- Akramia hetych, uklučanyja i inšyja miechanizmy randomnaj ananimizacyi, jakija robiać identyfikacyju kamientataraŭ niemahčymaj (nie budziem ich raskryvać).
Takim čynam, my vyklučajem mahčymaść deananimizacyi, navat kali vy prajavicie lehkadumnaść. Redakcyi taksama nie budzie bačna, chto kamientuje.
Ci možna zaraz pasyłać «Našaj Nivie» infarmacyju praz formu dla kamientaroŭ, a nie praz bot? Tak, heta biaśpiečna, ale vy praz formu nie možacie pasyłać foty i videa.
Premaderacyja zachoŭvajecca, kab adsiakać abrazy, brud i pravakataraŭ.
U TH kamientaŭ my nie adkryvajem, bo tam dabicca takoj «biaśpieki navat dla lehkadumnych» kamientataraŭ niemahčyma.
My pakul uvodzim kamientavańnie ŭ testavym režymie i nie biarom asobnaha čałavieka na prymańnie kamientaŭ — spačatku pabačym, kolki ich idzie i ci vartaja ŭvohule aŭčynka vyčynieńnia. Tamu prabačcie, kali ŭ niejkija pieryjady sutak kamienty doŭha čakajuć premaderacyju. Acenim kolkaść i pamier kamientaŭ, tady vypracujem racyjanalnyja ałharytmy premaderacyi.
Za novuju mahčymaść kamientavać vializnaja padziaka biełaruskim prahramistam. Uvohule, uniosak biełaruskich ajcišnikaŭ u zachavańnie biełaruskaj prastory svabody i infarmacyi nieacennaja. Jany sapraŭdnyja hieroi našaha času.
My vaš hołas, dapamahajcie nam havaryć. Žyvie Biełaruś!
Kamientary