Ukrainskaja Mižviedamasnaja kamisija pa mižnarodnym handli (MKMH) pryniała rašeńnie admianić z 19 žniŭnia spahnańnie śpiecyjalnych pošlin na šerah tavaraŭ ź Biełarusi, jakija byli ŭviedzienyja Ukrainaj u adkaz na ŭviadzieńnie Biełaruśsiu licenzavańnia šerahu tavaraŭ, što ŭvoziacca z-za miežaŭ Mytnaha sajuza. MKMH rasceńvała tyja biełaruskija rašeńni jak dyskryminacyjnyja.
Čakajecca, što paviedamleńnie ab pryniatym rašeńni budzie apublikavanaje ŭ haziecie «Uriadovyj kurjer» 8 žniŭnia, pieradaje Interfaks-Ukraina.
Pavodle paviedamleńnia, Minekanamraźvićcia Ukrainy raźličvaje, što Respublikaj Biełaruś u bližejšy čas nie budzie ažyćciaŭlać licenzavańnie ŭkrainskich kandytarskich vyrabaŭ i syraviny dla ich vytvorčaści, asobnych vidaŭ makaronnych vyrabaŭ, piva soładavaha, cemientu, škła paliravanaha i škłatary.
«Razam z tym vielmi važna, kab biełaruski bok zabiaśpiečyŭ admienu pahadnieńniaŭ ab pastaŭkach tavaraŭ, jakimi vyznačajucca cenavyja i kolkasnyja abmiežavańni, zaklučanyja pamiž ukrainskimi eksparciorami i dziaržorhanami Respubliki Biełaruś», — adznačajecca ŭ paviedamleńni.
Ale, adnačasova z pryniaćciem hetaha rašeńnia mižviedamasnaj kamisii pa mižnarodnym handli, praduhledžana, što
śpiecyjalnaja pošlina moža być adnoŭlenaja da 31 śniežnia 2016 hoda pa zajavie ŭkrainskich vytvorcaŭ-eksparcioraŭ u vypadku najaŭnaści faktu dyskryminacyjnych dziejańniaŭ z boku Biełarusi.
«Taki ałharytm dziejańniaŭ bakoŭ zabiaśpiečyć u ścisłyja terminy źniać handlovyja barjery ŭ handli pamiž našymi krainami i niaŭchilna vykanvać Damovu ab zonie svabodnaha handlu SND ad 18 kastryčnika 2011 hoda», — padkreślivajecca ŭ paviedamleńni.
Nahadajem, 1 maja Biełaruś ŭviała licenzavańnie impartu piva z-za miežaŭ MC. 1 červienia — licenzavańnie impartu asobnych vidaŭ makaronnych vyrabaŭ, a taksama kandytarskich vyrabaŭ i syraviny dla ich vytvorčaści z-za miežaŭ MS, z umovaj papiaredniaha padpisańnia pahadnieńniaŭ ab minimalnych cenach z kancernam «Biełdziaržcharčpram».
U siaredzinie lipienia Ukraina ŭviała pošliny na biełaruskija małočnuju pradukcyju, kandytarskija vyraby, piva, elektralampy napalvańnia, ŭhnajeńni, šyny, chaładzilniki.
24 lipienia Biełaruś admianiła licenzavańnie impartu niekatorych tavaraŭ z krain SND z ahavorkaj: u hetych krainach nie pavinny vykarystoŭvacca abmiežavańni ŭ dačynieńni da biełaruskaj pradukcyi.
Kamientary