Sacyjał-demakraty pryśviacili pieramohu ŭ Kubku Karpienki Mikałaju Statkieviču
U Minsku 9 žniŭni prachodziŭ 18-y turnir pa futbole «Kubak Svabody» pamiaci biełaruskaha palityka Hienadzia Karpienki.
Sioleta ŭ turniry ŭziali ŭdzieł 12 kamand.
Pa vynikach losavańnia jany byli raźmierkavanyja na čatyry hrupy.
U pieršaj zhulali kamandy arhkamiteta pa stvareńni partyi «Biełaruski ruch», Partyi BNF i telekanała «Biełsat»,
druhoj — Abjadnanaj hramadzianskaj partyi, ruchu «Za Svabodu» i arhanizacyi «Maładaja Biełaruś»,
treciaj — Biełaruskaj asacyjacyi žurnalistaŭ (BAŽ), haziety «Naša niva» i Biełaruskaj sacyjał-demakratyčnaj partyi (Hramada),
čaćviortaj — Biełaruskaha Chielsinkskaha kamiteta, arhkamiteta partyi «Biełaruskaja chryścijanskaja demakratyja» i Biełaruskaj partyi levych «Spraviadlivy śviet».
U finale abjadnanaja kamanda Biełaruskaj sacyjał-demakratyčnaj partyi (Hramady) i arhkamiteta Biełaruskaj sacyjał-demakratyčnaj partyi «Narodnaja hramada» vyjhrała ŭ letašniaha čempijona — kamandy BAŽ. Treciaje miesca zaniaŭ «Biełaruski ruch».
Pieramohu čempijony pryśviacili palitviaźniu Mikałaju Statkieviču. Paśla vyzvaleńnia palityka jany abiacajuć uručyć hety pryz Statkieviču.
«My vierym, što hety naš maleńki ŭkład u padtrymku Mikałaja paspryjaje tamu, kab jon chutčej ŭklučyŭsia ŭ našu kamandu. My vierym u jaho, chaj i jon u nas nie sumniavajecca. Naš Kubak - dla Mikałaja. I hety Kubak Svabody my abaviazkova jamu ŭručym. Heta jaho pieramoha «, - prakamientavaŭ rašeńnie kamandy aktyvist Kirył Žyvałovič.
Turnir «Kubak Svabody» pravodzicca z 1997 hoda. Spabornictvy byli prymierkavanyja da pryniaćcia Dekłaracyi ab suvierenitecie Respubliki Biełaruś, i ŭ ich aktyŭna ŭdzielničaŭ Hienadź Karpienka. Paśla śmierci palityka turnir nazvali jaho imiem.
Jak adznačyŭ u intervju BiełaPAN kiraŭnik Abjadnanaj hramadzianskaj partyi Anatol Labiedźka, sioleta spabornictvy atrymalisia bolš pradstaŭničymi — da ich dałučylisia čatyry novyja kamandy. Składanaściaŭ z arendaj pola ŭ arhanizataraŭ nie było, a voś padčas turniru jon zaŭvažyŭ niekalkich čałaviek «u cyvilnym», jakija nazirali za hulnioj.
Dźmitryj Łukašenka choča pastavić pad kantrol usie mabilnyja telefony11
Kamientary