Kiraŭnik fiederalnaj słužby RF pa vieterynarnym i fitasanitarnym nahladzie (Raśsielhasnahlada) Siarhiej Dankviert siońnia znachodzicca ź vizitam u Biełarusi.
Jak paviedamili ŭ pres-słužbie Raśsielhasnahlada, Dankviert praviadzie pieramovy ź ministram sielskaj haspadarki i charčavańnia Biełarusi Leanidam Zajcam, hałoŭnym vieterynarnym inśpiektaram krainy Juryjem Pivavarčykam, a taksama dyrektaram Hałoŭnaj dziaržaŭnaj inśpiekcyi pa nasieńniavodstvie, karancinie i abaronie raślin Leanidam Plaško.
Na pieramovach buduć abmiarkoŭvacca ŭ tym liku pytańni niedapuščeńnia reekspartu z terytoryi Biełarusi ŭ RF pradukcyi tych krain, u dačynieńni da jakich Rasija ŭviała sankcyi, a taksama prablema baraćby z afrykanskaj čumoj śviniej.
Nahadajem, na minułym tydni Rasija na hod zabaraniła impart šerahu sielskahaspadarčych i charčovych tavaraŭ z krain, jakija ŭviali sankcyi ŭ dačynieńni da rasijskich čynoŭnikaŭ i arhanizacyj, — heta ZŠA, dziaržavy ES, Kanada, Aŭstralija i Narviehija. U adpaviedny śpis trapili jałavičyna, śvinina, ptuška, sadavina, aharodnina, syry i małočnaja pradukcyja, arechi i inšyja pradukty.
U suviazi z hetym Biełaruś vykazała hatoŭnaść pavialičyć abjom pastavak svajho charčavańnia ŭ Rasiju. Jak zajaviŭ 7 žniŭnia pieršy namieśnik ministra sielskaj haspadarki i charčavańnia Leanid Marynič, Biełaruś hatova pastaŭlać charčavańnie ŭ Rasiju zamiest krain, u dačynieńni da jakich Maskva ŭvodzić sankcyi. «Dla nas heta kłandajk. My hatovyja zamianić zachodnija krainy pa mnohich pazicyjach u častcy charčavańnia», — skazaŭ čynoŭnik.
Na 13 žniŭnia zapłanavany vizit biełaruskaj delehacyi ŭ Maskvu. Tam pavinny prajści pieramovy ź vice-premjeram Rasii Arkadziem Dvarkovičam pa pytańniach pastavak biełaruskaha charčavańnia ŭ RF.
Pavodle raźlikaŭ Minsielhascharča, da kanca hetaha hoda Biełaruś hatova pastavić na rasijski rynak bolš za 2 młn. ton małočnych i bolš za 150 tys. ton miasnych vyrabaŭ. U hrašovym vyražeńni pastaŭki sielhaspradukcyi ŭ Rasiju ŭ pieryjad sa žniŭnia pa śniežań mohuć skłaści 2 młrd. dołaraŭ. Takim čynam, valutnaja vyručka ad pastavak biełaruskaj sielhaspradukcyi i praduktaŭ charčavańnia za hety hod moža nablizicca da 6 młrd. dołaraŭ (u 2013 hodzie hety pakazčyk składaŭ 5,8 młrd. dołaraŭ).
Ciapier čytajuć
Trend siarod biełaruskich zumieraŭ i milenijałaŭ: usio bolš moładzi viartajecca žyć da baćkoŭ3
Kamientary