U Biełarusi ź viečara 14 žniŭnia niama dostupa da sajta «Chartyja'97». Dostup źnik kala 18:00, potym adnaviŭsia na karotki čas, zatym znoŭ źnik.
Naviedniki ŭ inšych krainach nie majuć prablem z dostupam.
Redakcyja sajta paviedamiła čytačam, što sajt błakujecca apierataram «Biełtelekam» pa ip-adrasie:
«Rasśledavańnie pakazała, što błakavańnie ŭstanoŭlena na šluzie dziaržaŭnaj sietki pieradačy dadzienych «Biełpak» (strukturnaje padraździaleńnie RUP «Biełtelekam»), praź jakuju ŭ internet padłučanyja astatnija pravajdery. Pry sprobie zajści na charter97.org pieradača dadzienych abryvajecca na asbr1.net.belpak.by (93.85.80.66). Vierahodna, sajt błakujuć pa ip-adrasach. My pasprabavali zamianić IP, ale novy adras prapracavaŭ nie bolš za 10 chvilin».
Hałoŭny redaktar sajta «Chartyja'97» Natalla Radzina ŭpeŭniena, što biełaruski bok zabłakavaŭ dostup da sajta pa prośbie Rasii.
«Vidavočna, heta źviazana z aśviatleńniem našym sajtam situacyi va Ukrainie. Heta situacyja zryvaje płany pa dyjałohu ź Jeŭropaj. I za hetym paśledujuć sankcyi suprać «Biełtelekama» i ŭładaŭ u cełym», — miarkuje Radzina.
Isnuje niekalki šlachoŭ abyści błakiroŭki ŭ Biełarusi. Pa-pieršaje, možna karystacca proksi-siervierami. Možna taksama spampavać braŭzier Tor, jaki dazvalaje zachodzić na internet-staronki z zamiežnych ip-adrasoŭ. Samy prosty sposab — u akno pierakładčyka Google Translate uvieści adras sajta http://www.charter97.org/.
Raniej sajt «Chartyja'97» byŭ častkova zabłakavany na terytoryi Rasii. 6 žniŭnia pavodle patrabavańnia Hienprakuratury RF byŭ spynieny dostup da dvuch artykułaŭ sajta ab maršy za fiederalizacyju Sibiry.
