«Praź Ministerstva justycyi prachodziać usie narmatyŭnyja akty — dyrektyvy, dekrety, zakony, ukazy. Siońnia pa daručeńni prezydenta krainy my rychtujem prajekty nastupnych zakonaŭ: «Ab asnoŭnych administracyjnych pracedurach», «Ab zvarotach», rychtujucca pałažeńni, jakija buduć abaraniać pravy ŭłaśnikaŭ žylla pry znosie damoŭ. Rychtujecca novy dekret prezydenta «Ab asobnych pytańniach rehulavańnia pradprymalnickaj dziejnaści ŭ sielskaj miascovaści». Jašče adzin prajekt, jaki my rychtujem nazyvajecca «Ab aktyvizacyi pryciahnieńnia zamiežnych investycyj». My budziem davać ilhoty tym arhanizacyjam, jakija majuć investycyi z‑za miažy. Budzie praciahvacca sproščvańnie nataryjalnych struktur», — skazaŭ Viktar Hałavanaŭ.
Za minuły hod 274 asoby praz sudy byli adnoŭleny na pracy. Na dumku ministra heta śviedčyć pra «nizkuju pravavuju kulturu pracadaŭcaŭ». Sioleta rehistracyi byli pazbaŭlenyja 20 ryełterskich arhanizacyj, dziejnaść jakich ad niadaŭniaj pary pačaŭ rehulavać Minjust.
Na siońniašni dzień u Biełarusi zarehistravana 15 palityčnych partyj, 36 prafsajuzaŭ, 19 sajuzaŭ, 61 fond i bolš za 2000 hramadzkich arhanizacyj. Za hety hod było zarehistravana 72 hramadzkich arhanizacyj. Pa słovach Hałavanava, ministerstva «rada lubomu hramadzkamu abjadnańniu niezaležna ad taho, čym jano zajmacca i jaki status maje». Dakumenty na rehistracyju «Biełaj Rusi» ŭ Minjust pakul nie padavali.
Što datyčyć palityčnych partyj, to ministar zajaviŭ, što jahonaje viedamstva «paškadavała PKB», kali tolki prypyniła ich dziejnaść na 6 miesiacaŭ. Amal za tyja samyja parušeńni zakanadaŭstva partyja žančyn «Nadzieja» była likvidavanaja. Ministerstva justycyi planava pravodzić pravierku ŭsich palityčnych partyj. U planach likvidacyi inšych palityčnych partyj pakul niama.
Viktar Hałavanaŭ pierakanany, što ŭstanovy papraŭčaha typu pavinny pierajści ad Ministerstva ŭnutranych spravaŭ u jurysdykcyju Ministerstva justycyi. Biełaruś adzinaja kraina ŭ SND, dzie heta pakul nia zroblena. Hałavanaŭ paviedamiŭ, što heta pytańnie ciapier razhladaje A.Łukašenka i ŭ bližejšy čas jano budzie vyrašana.
Viktar Hałavanaŭ padvierh krytycy dziejnaść MUS pa amnistyjach. Na jahonuju dumku, amnistyi ŭ Biełarusi adbyvajucca tolki paśla pieranasielenaści turmaŭ. «Palityka ŭ pytańni amnistyi pavinna być bolš pradumanaja. I kiravacca my najpierš pavinny nie pieranasielenaściu turmaŭ, a metazhodnaściu znachodžańnia za kratami taho ci inšaha złačyncy. Spadziajomsia, što ŭ chutkaj perspektyvie tak i budzie», — skazaŭ ministar.
Taksama Viktar Hałavanaŭ paviedamiŭ pra jašče adnu navinku — bližejšym časam budzie ŭviedzienaja specyjalnaja forma adzieńnia dla advakataŭ.
 |
 |
 |
