Lik rasiejcaŭ, jakija radujucca anieksii Kryma Rasijaj i ŭchvalajuć jaje, padaje.
Pra heta śviedčyć apytańnie rasiejskaj sacyjałahičnaj słužby «Levada-Cientr».
Adznačajecca, što pačućcio radaści ad anieksii Kryma siarod respandentaŭ źniziłasia na 7% (23% u krasaviku suprać 16% u žniŭni), uchvaleńnia — na 6% (z 47% u sakaviku i 46% u krasaviku da 40% u žniŭni).
Hatoŭnaść hramadzian u toj ci inšaj miery «płacić» za Krym źniziłasia z 59% u sakaviku 2014 hoda da 50% u žniŭni. Kolkaść respandentaŭ, jakija «zusim nie hatovyja» ŭskłaści na svaje plečy ŭtrymańnie paŭvostrava vyrasła z 19% u sakaviku da 28% u žniŭni.
Bolš za pałovu rasiejcaŭ (58%) razhladajuć niehatyŭnuju reakcyju Zachadu na ŭkrainskuju palityku Rasii jak imknieńnie nacisnuć na Rasiju, skarystaŭšysia ŭkrainskim kryzisam. Tolki 13% źviazvajuć takoje staŭleńnie Zachadu z parušeńniem normaŭ mižnarodnaha prava.
Raście i ŭśviedamleńnie taho, što anieksija Kryma ŭzmacniaje nianaviść ukrainskaha naroda ŭ adnosinach da Rasii. Kali ŭ sakaviku tolki 17% respandentaŭ ličyli, što «krymskaja kampanija» nie vyklikaje va Ukrainie asablivych niehatyŭnych pačućciaŭ da Rasii, to ŭ žniŭni hetaja ličba skaraciłasia da 9%. U toj ža čas, 38% rasiejcaŭ ciapier ličać, što anieksija Kryma vyklikała ŭ Ukrainie nianaviść da Rasii ŭ cełym (suprać 24% u sakaviku).
Apytańnie praviedziena 22-25 žniŭnia 2014 pa reprezientatyŭnaj usierasijskaj vybarcy haradskoha i sielskaha nasielnictva siarod 1600 čałaviek va ŭzroście 18 hadoŭ i starejšych u 134 nasielenych punktach 46 rehijonaŭ krainy. Raźmierkavańnie adkazaŭ pryvodzicca ŭ pracentach ad ahulnaj kolkaści apytanych razam z dadzienymi papiarednich apytańniaŭ. Statystyčnaja chibnaść dadzienych hetych daśledavańniaŭ nie pieravyšaje 3,4%.
Kamientary