Pieršy sakratar BRSM: Što my nie adkazvajem vam pa-biełarusku — heta pryncypovaja pazicyja 

6 vieraśnia Biełaruski respublikanski sajuz moładzi adznačaje svajo 12-hodździe. Z hetaj nahody BRSM pravioŭ tradycyjnuju pres-kanfierencyju, u jakoj raskazaŭ pra svaju dziejnaść.

Pavialičyć

U dziejnaści arhanizacyi nie šmat źmienaŭ. Asnoŭnymi prajektami zastajucca moładzievyja budaŭničyja atrady — jany ciapier pracujuć kruhły hod, i nie tolki tolki na biełaruskich abjektach kštałtu AES, abjaŭlenaj Łukašenkam «moładzievaj budoŭlaj», ale i jeździać na zarobki ŭ Rasiju. Aktyŭna raźvivajucca i moładzievyja atrady achovy pravaparadku, u jakich moładź pracuje razam ź milicyjaj i rychtujecca dla słužby ŭ siłavych strukturach.

Vialikaja dola ŭsioj dziejnaści BRSM skancentravana na hramadska-patryjatyčnym vychavańni, jakoje krucicca ŭ asnoŭnym vakoł Druhoj suśvietnaj vajny. Tak, sioleta sajuz ładzić prajekty «Dziakuj za Pieramohu!», «Hieroi Pieramohi», «Moładzievy marafon «70!», «70 hadoŭ miru».

Karespandent «NN» pacikaviŭsia ŭ pradstaŭnikoŭ arhanizacyi, čamu ŭ aśviatleńni historyi Biełarusi BRSM isnuje taki pierakos u bok adnoj histaryčnaj padziei.

«My spynilisia mienavita na hetych prajektach praz tematyku 70-hodździa vyzvaleńnia Biełarusi. Adnak u nas masa prajektaŭ hramadzianska-patryjatyčnych i duchoŭnych. Jak prykład možna pryvieści ŭručeńnie pašpartoŭ na Dzień kanstytucyi i masu inšych prajektaŭ, u tym liku adnaŭleńnie pravasłaŭnych śviatyń — my ščylna supracoŭničajem i ź Biełaruskaj pravasłaŭnaj carkvoj, z katalickaj carkvoj, — kaža Buzoŭski.

U tym liku što tyčycca viedańnia historyi, u nas isnujuć kłuby «Što? Dzie? Kali?», prachodziać navukova-praktyčnyja kanfierencyi, i kłasy patryjatyčnaha vychavańnia [prajekt, jaki BRSM płanuje nieŭzabavie zapuścić u Biełarusi — NN], buduć zasnavanyja nie tolki na padziejach VAV, tam budzie praktyčna ŭsia historyja našaj krainy, jakoj my musim hanarycca, atrymlivać urok», — patłumačyŭ sakratar Centralnaha kamiteta HA BRSM Dźmitry Varaniuk.

Pavialičyć

Pieršy sakratar BRSM Ihar Buzoŭski taksama patłumačyŭ, što BRSM robić akcent na 70-hodździ pieramohi ŭ Druhoj suśvietnaj vajnie, bo arhanizacyja vyrašyła dałučycca da ahulnarespublikanskaha śviatkavańnia.

Adnak pavodle Buzoŭskaha, inšyja aśpiekty kulturnaha vychavańnia vielmi važnyja. Vidać, nastolki, što BRSM navat nie ličyć siabie vartaj zakranać hetyja temy: 

«Vyvučajučy historyju, my realizujem prajekty, u pieršuju čarhu kab jany byli asabista pranizanyja, kab moładź pravodziła mierapryjemstvy, nakiravanyja na biełaruskuju movu, na vyvučeńnie historyi.

Toje, što my siońnia nie havorym, navat na vaša pytańnie nie adkazvajem pa-biełarusku — heta pryncypovaja pazicyja, kab nie kazać pra niekatoryja rečy niapravilna, niepryhoža.

Kali vieści havorku na aficyjnym uzroŭni, chaciełasia b… Ja sam ź vioski, viedaju biełaruskuju, ale nie chaciełasia b rabić pamyłki. Heta sprava budučyni, heta sprava pierśpiektyvy. My budziem rabić usio, kab i mova naša raźvivałasia, i kulturnyja tradycyi našy raźvivalisia. Ahromnistaja kolkaść prajektaŭ, u tym liku «Uładar siała», pra jaki siońnia kazali, nakiravany na patrymku vioski, dzie našyja karani, dzie naša duša, dzie duša Biełarusi».

Razam z tym adznačać 500-hodździe Aršanskaj bitvy ŭ BRSM nie namierany, bo heta histaryčnaja padzieja «raźjadnoŭvaje» i źjaŭlajecca «destruktyŭnaj»:

«Kali histaryčny fakt nakiravany na rassłajeńnie pohladaŭ i ŭ kołach ludziej, jakija vyvučajuć vajennuju historyju, i historyju našaj z vami Biełarusi, isnuje prociborstva… Tamu na stvareńnie, na kanstruktyŭ — abmiarkoŭvać budziem, u tym liku i hetuju histaryčnuju datu, jakaja da siońniašniaha dnia vyklikaje niekatoryja sprečki ŭ historyi, sprečki siarod historykaŭ i ludziej, jakija mohuć (…) padavać i vykarystoŭvać hetyja daty ŭ destruktyŭnych napramkach. I kali my i budziem rabić niejkija prajekty, to tolki kab u našaj krainie było stvareńnie, mir i spakoj i paradak, jaki dazvolić mirna raźvivać krainu», — reziumavaŭ Buzoŭski.

• 0
• 0
• 0
• 0
• 0
• 0
• 0
• 0