Žychar Mahilova, hramadski aktyvist Alaksiej Paŭłoŭski nakiravaŭ prezidentu Rasijskaj Fiederacyi Uładzimiru Pucinu zvarot sa 138 podpisami ab spynieńni vajny va Ukrainie.
Jak paviedamiŭ Paŭłoŭski BiełaPAN, jon źbiraŭ podpisy na rynku rajcentra Karma Homielskaj vobłaści, dzie pradavaŭ svaju sielhaspradukcyju.
«Aburany tym biaźmiežžam, što tvoryć Rasija va Ukrainie, u znak salidarnaści ź jaje narodam, ja vyrašyŭ napisać zvarot da Pucina ad prostych hramadzian z zaklikam ustalavać mir va Ukrainie. U zvarocie ja zaklikaŭ Pucina vyvieści razam z humanitarnym kanvojem z Ukrainy ŭłasaŭcaŭ, čačencaŭ, terarystaŭ i inšyja destruktyŭnyja siły», — raskazvaje aktyvist.
Pavodle słoŭ Paŭłoŭskaha, za dva dni pad zvarotam padpisalisia 138 čałaviek, u tym liku niekalki rasijan i adzin hramadzianin ZŠA, jaki byŭ u Karmie ŭ haściach. Jak adznačyŭ aktyvist, niekatoryja pakupniki admaŭlalisia padpisacca i kazali, što im usio adno, ale mnohija achvotna padpisvalisia.
«U saviecki čas, kali była ahresija Amieryki ŭ Vjetnamie, aktyŭna źbiralisia podpisy za mir, a ciapier čamuści naša ŭłada biaździejničaje. Mianie heta aburyła, tamu ja vyrašyŭ źbirać podpisy sam», — prakamientavaŭ Paŭłoŭski.
Jak paviedamiŭ aktyvist, padčas zboru podpisaŭ da jaho padychodziła načalnik adździeła ideałahičnaj raboty, kultury i pa spravach moładzi rajvykankama, jakaja zajaviła, što Paŭłoŭski źbiraje podpisy biez sankcyi i vyklikała milicyju. Adnak aktyvist paśpieŭ schavać podpisy. Pavodle jaho słoŭ, supracoŭniki RAUS, jakija prybyli na miesca, ahledzieli jaho, ale ničoha nie znajšli.
U vyniku Paŭłoŭski nakiravaŭ zvarot sa 138 podpisami pa pošcie ŭ administracyju prezidenta RF. Adkaz z Kramla pakul nie pastupaŭ.
U adździele ideałahičnaj raboty, kultury i pa spravach moładzi Karmianskaha rajvykankama paviedamili, što ni jaho supracoŭniki, ni milicyja nie pieraškadžali zboru podpisaŭ. «Hety hramadzianin pražyvaje ŭ Mahilovie. Letam jon pryjazdžaje ŭ Karmianski rajon da svajakoŭ, baćkoŭ žonki. Na rynku ŭ Karmie jon pradavaŭ sielskahaspadarčuju pradukcyju i adnačasova źbiraŭ podpisy, jak my bačyli, za mir va Ukrainie. My ž taksama nie suprać miru va Ukrainie, tamu jamu nie pieraškadžali, prosta pacikavilisia, jakaja mienavita meta zboru podpisaŭ, i ŭsio», — rastłumačyła adna z supracoŭnikaŭ adździeła ideałahičnaj raboty, kultury i pa spravach moładzi rajvykankama.
Pavodle jaje słoŭ, miascovyja ŭłady dobra viedajuć Paŭłoŭskaha, bo raniej jon ad imia vieteranaŭ skłaŭ kalektyŭny zvarot z nahody nibyta prysutnaści na hierbie Karmy svastyki. Hety zvarot byŭ nakiravany ŭ Hienprakuraturu. Pavodle słoŭ supracoŭnika adździeła ideałahičnaj raboty, vieterany byli ŭviedzieny ŭ zman, a svastyka nie prysutničaje ŭ hierbie rajcentra. Hierb Karmy — siniaje pałatno, u siaredzinie piaredniaha boku dva biełyja šabielnyja efiesa, pakładzienyja ŭ andrejeŭski kryž. Asnova hierba i ściaha — radavy hierb «Abšłank», jaki naležyć rodu Bykoŭskich. «Vieterany sami byli aburanyja, što ad ich imia pastupiŭ taki zvarot», — dadała supracoŭnik adździeła rajvykankama.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary