Cieła školnika z Rečycy znajšli ŭ budynku supołki «Śviedak Ijehovy»
U rečyckaj supołcy śviedak Ijehovy znajšli cieła padletka. Pavodle papiaredniaj infarmacyi, Saša skončyŭ žyćcio samahubstvam.
Ci źviazana śmierć 16-hadovaha školnika z naviedvańniem hetaj relihijnaj arhanizacyi, albo ŭ trahiedyi inšyja pryčyny, vyśviatlaŭ karespandent «Homielskaj praŭdy».
U kamientary admoŭlena
Jak takoje mahło zdarycca z padletkam, jaki ŭvieś čas naviedvaŭ schodu aficyjna pryznanaj kanfiesii? Što mahło spravakavać Sašu na adčajny ŭčynak, dy jašče ŭ domie, dzie słužać Bohu? Takija pytańni źbiraŭsia zadać kiraŭniku rečyckich śviedak Ijehovy. Adnak jon ad razmovy z žurnalistam admoviŭsia.
Pra hibiel junaha siabra relihijnaj arhanizacyi łakanična prainfarmavali va ŭpraŭleńni Śledčaha kamiteta pa Homielskaj vobłaści. Jaho aficyjny pradstaŭnik Maryja Kryvanohava paviedamiła, što bačnych prykmiet hvałtoŭnaj śmierci nie vyjaŭlena. Nazvała asnoŭnuju viersiju — samahubstva. Na heta pakazvaje i pieradśmiarotnaja zapiska, źmiest jakoj u intaresach daśledčaj pravierki pakul nie raskryvajecca.
U Rečycy adrazu paśla trahičnaha vypadku pabyvali pradstaŭniki abłasnych struktur, jakija kuryrujuć pracu ź dziećmi. Dzicia nie znachodziłasia ni na jakich prafiłaktyčnych ulikach, adznačyŭ namieśnik staršyni kamisii pa spravach niepaŭnaletnich abłvykankama Jaŭhien Mitkievič. Jak raspaviała starejšy pamočnik prakurora vobłaści Volha Šaŭčenka, chłapčuku padabałasia dapamahać ajčymu-pradprymalniku, a jašče hulać u anłajn-hulni. Jon prachodziŭ miedkamisiju, kab słužyć u vojsku, jak jaho starejšy brat. Praŭda, toj jašče padletkam źjechaŭ z Rečycy da rodnaha baćki ŭ Kalinkavičy.
Padobnych sumnych vypadkaŭ ź dziećmi ŭ zarehistravanych relihijnych arhanizacyjach Homielščyny nie zmahła ŭzhadać pamočnik prakurora vobłaści Viera Zamojskaja. A ŭ jaje amal 30-hadovy staž pracy ŭ prakuratury.
Chto takija śviedki Ijehovy?
Adnym z asnoŭnych ich dahmataŭ źjaŭlajecca pałažeńnie ab chutkim kancy śvietu. Jaho śviedki Ijehovy čakali ŭ 1914, 1920, 1975, 1984 hadach. Im zabaraniajecca słužyć va Uzbrojenych Siłach, salutavać ściahu, udzielničać u vybarach, zajmać jakija-niebudź dziaržaŭnyja pasady. Usie dziaržaŭnyja arhanizacyi pryznajucca hrachoŭnymi i bieskarysnymi. Kalady i Pascha nie śviatkujucca, nie dazvalajecca adznačać i dni naradžeńnia. Śviedki Ijehovy adprečvajuć pieralivańnie kryvi, navat u vypadku śmiarotnaj niebiaśpieki.
Dakučlivyja hości
Pierad adjezdam u Rečycu z dapamohaj kalehaŭ adšukaŭ vodhuki našych čytačoŭ pra ijehavistaŭ. Tak, u minułym hodzie Siarhiej pakinuŭ kamientar da artykuła «Jak nie z hetaha śvietu» na internet-staroncy «HP». Narakaŭ, što z-za śviedak Ijehovy hublaje žonku. «Raniej my ŭsioj siamjoj družna ŭpryhožvali navahodniuju jołku. U apošnim takim mierapryjemstvie jana nie ŭdzielničała, kažučy, što ničoha drennaha nie robić. Sprabavaŭ spračacca, pryvodziŭ prostyja dokazy, ale hetyja ludzi, jak i maja žonka, užo ślapyja», — škadavaŭ Siarhiej.
Jašče adzin čytač «HP» padzialiŭsia svaim vopytam znosin z prapaviednikami. U Homieli paru hadoŭ tamu Juryj znajšoŭ ŭ kvatery ŭ svajoj 90-hadovaj babuli litaraturu śviedak Ijehovy. Dačakaŭsia raspaŭsiudžvalnikaŭ i paprasiŭ ich nie turbavać pažyłuju žančynu. Adnak praź niekatory čas jany znoŭ źjavilisia z bukletami. Na hety raz hamialčuk pryhraziŭ milicyjaj. Pra ijehavistaŭ u padjeździe nie było čuvać kala dvuch hadoŭ. I voś na dniach dakučlivyja hości znoŭ uhavorvali pažyłuju žančynu ŭpuścić ich u kvateru dla «dušeŭnaj» hutarki.
U orhany miascovaj ułady pastupali skarhi ad žycharoŭ na śviedak Ijehovy, adznačyŭ načalnik adździeła pa spravach relihij, nacyjanalnaściaŭ i maładziožnaj palityki hałoŭnaha ŭpraŭleńnia ideałahičnaj raboty, kultury i pa spravach moładzi abłvykankama Dźmitryj Čumakoŭ. Čaściakom zajavy tyčylisia raspaŭsiudžvańnia relihijnych materyjałaŭ na vulicach. Za parušeńnie Zakona «Ab svabodzie vieravyznańniaŭ i relihijnych arhanizacyjach» u dačynieńni da ich ŭžyvalisia miery ŭździejańnia. Členam homielskaj, kalinkavickaj i žłobinskaj supołak vynosilisia piśmovyja papiaredžańni, a śvietłahorskaj (u ich kanfiskavali 533 asobniki drukavanaj pradukcyi i 39 kampakt-dyskaŭ) — štraf. U 2012 hodzie było zafiksavana dva takija vypadki, u minułym — try, a ŭ hetym - -adzin. Byli i sihnały ab nibyta vymańvańni ijehavistami hrošaj, ale dadzienaja infarmacyja nie paćvierdziłasia.
Zona maŭčańnia
U Homieli sustreŭsia ź ijehavistam z bolš čym 10-hadovym stažam i raspavioŭ jamu pra Sašu z Rečycy. Mikałaj uzhadaŭ, jak sam niekali pieražyŭ prystup isteryki ŭ škole. Zdavałasia b, usio było dobra, vyvučaŭ Bibliju ź vietlivymi ludźmi sa śviedkaŭ Ijehovy. Za atrymańnie relihijnych viedaŭ u supołcy nibyta ničoha nie patrabavali naŭzamien. Pry im nie abmiarkoŭvali, chto jakuju sumu achviaravaŭ, ale za propaviedzi davodziłasia štomiesiac davać spravazdaču. Adstajučych nie saromili pryludna, a asabista nahadvali pra atrymanuju imi čaroŭnuju praŭdzu i miakka — pra słužeńnie. Pryvodzili ŭ prykład lidaraŭ abščyny, jakija ŭ štodzionnych kazańniach pravodziać praktyčna da 120 hadzin na miesiac.
Značna paźniej Mikałaj zrazumieŭ pryčyny taho dziciačaha zryvu. Raspavioŭ ab dziciačym strachu trapić u lik tych, chto zahinie ŭ kancy śvietu (pavodle viery ijehavistaŭ, vybranyja zastanucca). Pieražyvaŭ za blizkich, jakim nakanavana zahinuć u Armahiedonie. Pastajanna dakaraŭ siabie za heta.
Z časam jamu prapanavali pavyšeńnie pa duchoŭnaj słužbie, ale namiaknuli, što treba padciahnuć «vytvorčyja» pakazčyki. I tut hadami zatojenyja supiarečnaści zajavili pra siabie va ŭvieś hołas. Pra ich hamialčuk raspavioŭ kiraŭnikam śviedak Ijehovy, a tyja nazvali Mikałaja adstupnikam. Paśla čaho ŭsie členy relihijnaj supołki adviarnulisia ad jaho i pierastali ź im mieć znosiny.
U subotu zamiest škoły — propaviedź
Usiaho niekalki dzion 16-hadovy Saša nie dažyŭ da pačatku zaniatkaŭ u vypusknym kłasie škoły, dzie pravučyŭsia ŭsiaho adzin hod. Razam ź siamjoj jon pierajechaŭ bližej da doma relihijnaj arhanizacyi, u jakuju chadziŭ z maci i ajčymam. Novamu kłasnamu kiraŭniku maci skazała, što jaje syn pa subotach naviedvaje schody ijehavistaŭ i ŭ škole źjaŭlacca nie budzie.
Jak kažuć u škole, Saša lubiŭ kammunikavać z adnahodkami, z zadavalnieńniem abaraniaŭ honar kłasa na spabornictvach, ale voś u KVZ i dyskatekach udziełu nie prymaŭ. Napiaredadni trahičnaj padziei jamu prapanavali tančyć vals u Dzień viedaŭ. Pa słovach piedahohaŭ, jon škadavaŭ, što pakul nie ŭmieje tančyć, ale źbiraŭsia navučycca da vypusknoha balu.
Pry zhadvańni proźviščy Sašy pracaŭnica školnaha miedpunkta adrazu ŭzhadała chłopčyka. Pavodle jaje słoŭ, jon byŭ śvietłym, soniečnym chłopcam.
Ja bačyŭ adnakłaśnikaŭ, ź jakimi Saša vučyŭsia. Zvyčajnyja chłopcy z padletkavymi intaresami. Niekatoryja ź ich navat nie zdahadvalisia ab relihijnych pohladach novieńkaha. A voś piedahohi viedali i ździvilisia, kali Saša nie pakinuŭ lekcyju, jakuju vioŭ zaprošany ŭ škołu pravasłaŭny śviatar.
Pačućcio viny
U toj złapomny viečar Saša pajšoŭ navodzić paradak u budynku supołki śviedak Ijehovy, jaki praz darohu ad jaho doma. Praz paru hadzin ajčym nie zmoh trapić u začynienaje znutry pamiaškańnie. Kali dźviery adčynili, dziciaci ŭžo nie było ŭ žyvych.
Chodziać razmovy, što ŭ niekalkich radkach pieradśmiarotnaj zapiski Saša patłumačyŭ apošniaje rašeńnie ŭčynkami, jakija źnievažajuć imia Hospada. Taksama ŭ akruzie kažuć, što chłopiec nie moh daravać sabie hrachoŭ, na jakija zvyčajnyja padletki naohuł nie źviartajuć uvahi.
Sašavy susiedzi vykazali zdahadku, što chłopčyk moh pieražyvać z-za niejkich dziciačych svavolstvaŭ, jakija adnaviercy ličyli hrachoŭnymi. Bajaŭsia ich ahałoski i što heta adabjecca na jaho baćkach i blizkich siabrach, ź jakimi naviedvaŭ prychod. Nie vyklučana, što Saša viedaŭ, jak pastupajuć z hrešnikami, to bok adstupnikami.
Ja nie moh nie zajści ŭ samu supołku śviedak Ijehovy. Na budynku čamuści niama navat šyldy. Niekalki razoŭ stukaŭsia ŭ začynienuju bramku, ale nichto nie adčyniŭ. Pahavaryŭ ź ludźmi, čyje damy la budynka supołki. Usie dobra adzyvalisia pra chłopca i jaho baćkoŭ. Uładalniki siadzib uspomnili čas, kali pačali ŭzvodzić kultavy budynak. Mnohija žychary nie chacieli, kab jaho budavali pobač. Jak adčuvali. Ale ci nie zdaryłasia padobnaja historyja, kali b…
Choć u historyi niama ŭmoŭnaha ładu.
Ciapier čytajuć
Staŭ viadomy sens kryminalnaj «spravy strachaŭščykoŭ»11
Kamientary