U piatnicu, 10 kastryčnika, u ofisie ekołaha-krajaznaŭčaha abjadnańnia «Nieruš» u Baranavičach adbyŭsia pakaz znakamitaj amierykanskaj kinakarciny «12 raźjušanych mužčyn» u pierakładzie na biełaruskuju movu.
Andrej Kim, režysior i kiraŭnik adzinaha prafiesijnaha abjadnańnia ahučki na biełaruskuju movu «KinaKonh» pravioŭ majstar-kłas i prezientacyju adnoj z prac supołki. Jak raskazaŭ Andrej, u biełaruskim prakacie i kinateatrach niama filmaŭ, prafiesijna pierakładzienych i ahučanych pa-biełarusku. Tamu «KinaKonh» maje na mecie papularyzacyju inšamoŭnych kinakarcin na rodnaj movie siarod biełarusaŭ.
Film «12 raźjušanych mužčyn» byŭ abrany niezdarma. Heta kłasika suśvietnaha kiniematohrafa. Režysiorski debiut Sidni Lumeta pa pravie ličycca adnoj ź lepšych karcin stahodździa, maje najvyšejšyja rejtynhi i źjaŭlajecca abaviazkovym dla vyvučeńnia ŭ kinaakademijach va ŭsim śviecie. Kinastužka zajmaje 2-je miesca ŭ śpisie lepšych sudovych dram pa viersii AFI (Amierykanski instytut kinamastactva).
«12 raźjušanych mužčyn» – heta historyja ab tym, jak 12 prysiažnych pavinny vyrašyć, ci zabivaŭ padsudny — padletak z truščobaŭ – svajho baćku. Kali jaho vinavataść pryznajuć, chłopca čakaje elektryčnaje kresła, kali nie – vyzvaleńnie. Zhodna z zakonam rašeńnie pavinna być pryniata adzinahałosna. Sprava zdajecca vidavočnaj, 11 čałaviek hałasujuć «za» vinavataść, ale adzin vykazvaje sumnieŭ i prapanuje abmierkavać usio jašče raz…
Film vučyć tamu, što žyćcio – heta najvyšejšaja kaštoŭnaść i nichto nie maje prava pazbavić čałavieka žyćcia, navat dziaržava.
Tydzień suprać śmiarotnaha pakarańnia ŭ Biełarusi prajšoŭ 5–10 kastryčnika. Naša kraina źjaŭlajecca adzinaj u SND, dzie isnuje mahčymaść pakarańnia śmierciu. Za apošniaje dziesiacihodździe ŭ Biełarusi štohod prysudžajucca da rasstrełu ad 2 da 9 čałaviek.
Asudžany moža prasić ab pamiłavańni, h.z. zamianić rasstreł na pažyćciovaje źniavoleńnie, ale viadoma tolki ab adnym pamiłavańni za ŭsie hady praŭleńnia Alaksandra Łukašenki.
Kamientary