Hienierał Sivakoŭ na raźvitańnie z Frałovym: Chto nie pryjšoŭ siudy, niachaj heta budzie na ich sumleńni
Na raźvitańnie ŭ Minsku z apazicyjnym hienierałam Valeram Frałovym pryjšoŭ były ministr unutranych spraŭ Biełarusi Juryj Sivakoŭ. U razmovie z karespandentam radyjo «Svaboda» hienierał patłumačyŭ, što byŭ siabram hienierała Frałova.
«My ź im siabravali daŭno, z taho času, kali jon jašče byŭ staršym lejtenantam, razam słužyli. Razam vučylisia ŭ akademii, u adzin hod jaje zakančvali. U cełym u nas ź im byli vielmi dobryja, siabroŭskija adnosiny da samaha apošniaha dnia. Heta byŭ tałkovy hienierał, vielmi razumny čałaviek, prystojny aficer. Dla čałavieka dziejnaha, takoha składu jak jon, jamu nieabchodnaje pole dziejnaści. Kali jamu pola dziejnaści nie dajuć, jon šukaje pole bitvy. Heta, kali vielmi koratka.
Što da roznaści palityčnych pohladaŭ, Sivakoŭ skazaŭ: «Viedajecie, nie treba błytać asabistyja adnosiny i pohlady. U nas čamuści pryniata ličyć, čyj ty čałaviek, da jakoj partyi adnosišsia. Adno druhomu nie pieraškadžaje. Jość asabistyja adnosiny i jość roznyja pohlady na roznyja, u tym liku palityčnyja i ekanamičnyja situacyi. Adno druhomu nie pieraškadžaje».
Sivakoŭ ličyć spravaj honaru patrebu raźvitacca ź niabožčykam: «Kali b ja nie pryjšoŭ, ja prosta pierastaŭ by siabie pavažać. Ničoha hieraičnaha ci zvyšardynarnaha tut niama. Heta narmalny ŭčynak čałavieka».
Sivakoŭ taksama asudziŭ toj fakt, što Frałova nie ŭšanavali adpaviedna jahonamu ranhu hienierała: «Usio, što tyčycca tych rytuałaŭ, jakija naležać zhodna ź jahonym statusam, tre' było vykanać. A što da tych, chto pabajaŭsia ci nie paličyŭ patrebnym pryjści, niachaj heta budzie na ich sumleńni».
Hienierał Frałoŭ pamior ad infarktu 9 listapada. Pachavali jaho ŭ Hrodnie, jakaja była jaho apošnim miescam słužby.
Kamientary