Siońnia — sud nad Arturam Fińkievičam

20 śniežnia a 10:30 u mahiloŭskim haradzkim sudzie (vuł. Dabralubava, 2) pačniecca razhlad kryminalnaj spravy ŭ dačynieńni da Artura Fińkieviča. Chłopcu pradjaŭlena abvinavačańnie ŭ art. 415 KK (uchileńnie ad adbyćcia pakarańnia). Pavodle hetaha artykułu jamu pahražaje da troch hadoŭ źniavoleńnia.

Fińkieviča źmiaścili ŭ śledčy izalatar 26 kastryčnika. Da hetaha chłopiec adbyvaŭ dvuchhadovaje abmiežavańnie voli ŭ mahiloŭskaj speckamendatury za palityčnyja hrafici, zroblenyja napiaredadni apošnich prezydenckich vybaraŭ. Toj termin užo skončyŭsia 9 śniežnia.

Napiaredadni byŭ nakiravany adkryty list sudździ Kraškinaj. «My patrabujem spynić kryminalny pieraśled i vyzvalić samaha maładoha viaźnia sumleńnia Artura Fińkieviča. Prosim Vas razhladać spravu Artura Fińkieviča kirujučysia maralnaściu i sumlennaściu, viedajučy, što najbolš spraviadlivy Božy sud i sud historyi, jakija z časam daduć adpaviednuju adznaku ŭsim čałaviečym dziejańniam» — adznačajecca ŭ liście.

Zvarot padpisali lider ruchu «Za svabodu» Alaksandar Milinkievič, narodny paet Nił Hilevič, piśmieńniki Hienadź Buraŭkin i Ŭładzimier Arłoŭ, mastak Alaksiej Maračkin, navukoviec-hieolah Radzim Harecki, palityk Pavał Sieviaryniec. Usiaho list maje 92 padpisanty.

Advakatam u Artura budzie Hanna Rybałka, sudździoj — Natalla Kraškina. Čakajecca, što na sud pryjedzie šmat chto z palitykaŭ i hramadzkich dziejačaŭ.

Źmicier Pankaviec

Dabracca ŭ Mahiloŭ z ranicy možna aŭtobusami i maršrutnymi mikraaŭtobusami z aŭtavakzału "Miensk-Uschodni":

adpraŭleńnie ŭ 6:10 (prybyćcio ŭ 9:10), 7:10 (pryb. 10:20), 7:40 (pryb. 10:50), 8:00 (11.00) i h.d.

0

0

0

0

0

0