Apošni kancert Ivana Achłabyścina padčas turne pa Biełarusi adbyŭsia ŭ Mahilovie — u najvialikšaj kancertnaj zali horadu — Pałacy vobłaści.
Na duchoŭnuju hutarku, jak paznačałasia ŭ reklamie, rasiejskaha aktora i śviatara Ivana Achłabyścina sabrałasia strakataja publika — ad moładzi da ludziej stałaha vieku.
Najvialikšaja kancertnaja zala Mahilova — Pałac vobłaści — raźličanaja na tysiaču miescaŭ. Na kancercie Achłabyścina jana była zapoŭnienaja bolš čym na pałovu. Tvorčy viečar doŭžyŭsia dźvie hadziny. Amal uvieś hety čas rasiejski hość adkazvaŭ na pytańni. Ich achvočyja zahadzia napisali na papierkach. Dziela abarony aŭtarskich pravoŭ fota i videazdymki vystupu rasiejskaha hościa zabaranili.
Adkazy na mnohija z pytańniaŭ publika vitała vopleskami. Ich zaŭvažna było mieniej, kali Achłabyścin adkazvaŭ na pytańnie: «Jakim jon bačyć vyjście z ukrainskaha kryzisu?»
«Spadziajusia, što ŭviaduć vojski. Ja nia baču nijakaha cyvilizacyjnaha vyjścia. Heta ž žach, što adbyvajecca. Słavianie siakuć słavian.
Heta toj Hardziejeŭ vuzieł, jaki treba raśsiekčy adzin raz. Uziaŭšy na siabie adkaznaść. Usim ža zrazumieła, što Ameryka ad nas nie adstanie. Vajna budzie. Nikudy ty nie padzienieśsia, bo my joj niavyhadnyja. Niečakana raptam ačuniali. A heta im nie padabajecca».
U nastupnych adkazach Achłabyścin udakładniŭ, što čym chutčej Rasieja ŭviadzie va Ŭkrainu vojski, tym mieniej zahinie ŭkraincaŭ.
Akramia Ameryki, na jahonuju dumku, va ŭkrainskim kryzisie vinavaty i raniejšy kiraŭnik Ukrainy, pry jakim kvitnieła karupcyja. Toje, što ciapier adbyvajecca va Ŭkrainie, davodziŭ Achłabyścin, Rasieja pieražyvała ŭ dzievianostyja i pačatku dvuchtysiačnych — pieradzieł majomaści.
Uvieści vojski va Ŭkrainu, pavodle Achłabyścina, Rasieju zmušajuć u tym liku i abstaviny:
«Bo kali hetaha nia budzie, to pačnucca chvalavańni i ŭ nas. Buduć napałochanyja aliharchi. Pakocicca kryvavy vał represij. U vas ža taksama chutka, jak razumieju, vybary. Značyć, bolš budzie aryštavanych pa roznych ekanamičnych artykułach. Jość ahulnyja dziaržaŭnyja zakanamiernaści. Les siakuć — ščepki laciać».
Samim ukraincam, davodziŭ Achłabyścin, nie daduć zamirycca nikoli. A Rasieja nie paźbiehnie vyrašeńnia ŭkrainskaha pytańnia:
«U vyniku heta na nas usio piarojdzie i ŭžo pierachodzić. Nas zacisnuli ŭ tupiku. Prosta prypierli. U nas užo syndrom zahnanaha ŭ kut źviera».
Rasiejec zajaviŭ, što Biełaruśsiu začaravany. Tut, pavodle jaho, žyvuć duža talerantnyja ludzi. Ich jon paraŭnaŭ z elfami. Kab być bolš pierakanaŭčym, Achłabyścin zhadaŭ pokazku pra biełarusa, jaki sieŭ na ćvik.
Achłabyścin abvierh čutki pra toje, što nabyŭ u Mahilovie kvateru. Adkazvajučy na pytańnie: «Ci planuje jaje nabyć?», rasiejec vykazaŭsia, što nia suprać byŭ by. U Biełarusi jamu nibyta kamfortna, a ad Maskvy jon stamiŭsia.
«Vy viedajecie — surjozna. Mianie Baćka nie biantežyć. Ja «kołchoźnik», jak baćka (zala ŭzryvajecca vopleskami). Ja ŭžo ŭ hadach. A ŭ jaho asnoŭny elektarat taki. To bok ja prosta ŭ «kasu traplaju» (śmiech).
«Vy pryjechali ŭ Biełaruś. Biełaruś — heta Rasieja? Ci jość u Biełarusi eŭrapiejskaja budučynia?» — zapytalisia ŭ Achłabyścina.
«A našto vam eŭrapiejskaja budučynia? Eŭropie b biełaruskuju budučyniu. U biednych narvehaŭ dziaciej adbirajuć i Im (ludziam ź nietradycyjnaj seksualnaj aryjentacyjaj — RS) addajuć.
Dzieciam ža spačatku ŭsio heta padabajecca, bo cikava, a potym ža heta psychalahičnaja traŭma. U Niamieččynie baćkoŭ sadziać u turmu za toje, što jany nie dazvalajuć naviedvać uroki seksualnaha vychavańnia, na jakich vučać, u čaćviortaj klasie, zajmacca ananizmam… Biełaruś — heta Rasieja? Tak, viadoma ž. Biełaja Rasieja».
Svoj tvorčy viečar Achłabyścin skončyŭ niečakana. Padziakavaŭ publicy i syšoŭ sa sceny. Śpiašaŭsia na ciahnik.
Tvorčyja viečaryny skandalna viadomy svaimi vykazvańniami pra sytuacyju va Ŭkrainie i krainach postsavieckaj prastory rasiejski aktor i śviatar Ivan Achłabyścin pravioŭ u Miensku, Horadni i Mahilovie. Praz hetyja zajavy hramadzianinu Rasiei zabaronieny ŭjezd va Ŭkrainu i Łatviju.
Arhanizavała biełaruskaje turne Ivana Achłabyścina kancertnaja ahiencyja «Šabli». Jaje dyrektar Uładzimier Šablinski na svajoj staroncy ŭ Fejsbuku zajaŭlaje, što nie źjaŭlajecca prychilnikam idejaŭ aktora i pryznaje, što niekatoryja ź ich, kali rasiejec byŭ by hramadzianinam Biełarusi, «całkam mahli b razhladacca z punktu hledžańnia dziejnaha zakanadaŭstva našaj krainy jak «raspalvańnie varožaści».
