Na miažy Biełarusi z rasijskaha boku ŭtvarylisia 15-kiłamietrovyja čerhi hruzavikoŭ. Adnačasova na miažy ź Litvoj biełaruskija mytniki try-čatyry dni marynujuć rasijskija fury, što jeduć tranzitam z Kalininhrada.
Ekśpierty ŭpeŭnienyja: takim čynam Biełaruś namahajecca zmusić Rasiju admianić dyskryminacyjnyja abmiežavańni na pastaŭki biełaruskaj sielhaspradukcyi ŭ Rasiju i adstajać svajo prava na svabodny tranzit.
Mytnyja słužby Biełarusi adnavili nadhlad hruzavoha aŭtatranspartu na miažy z Rasiejaj, paviedamiŭ pradstaŭnik rasijskaj Fiederalnaj mytnaj słužby (FMS). «FMS paćviardžaje, što biełaruskija mytniki adnavili svaju pracu na miažy z Rasijaj. Z našaha boku mytnaha kantrolu nie ažyćciaŭlajecca», — skazała TASS pradstaŭnica pres-słužby FMS Alena Hrak.
Taksama ŭ FMS paćvierdzili najaŭnaść ciažkaściaŭ pry pierasiačeńni hruzavym aŭtatranspartam rasiejska-biełaruskaj miažy.
Krynica ŭ adnoj z kampanij praduktovaha rynku kaža, što ŭsie hruzy z Kalininhrada (Karalaŭca), jakija jeduć u «vialikuju» Rasieju, u Biełarusi stali praviarać pa try-čatyry dni. Adhružanyja z Kalininhrada mašyny prachodziać rasiejska-litoŭskuju miažu, zajazdžajuć u Biełaruś, i ich nakiroŭvajuć u nazapašvalnik ŭ Ašmianach (Hrodzienskaja vobłaść). U hety nazapašvalnik traplali ŭsie mašyny, jakija pryjšli ŭ Biełaruś z 1 pa 4 śniežnia ŭklučna.
Čarha z fur kala 15 km udoŭžki sabrałasia na miažy Rasiei i Biełarusi na trasie M1 Maskva-Minsk-Bieraście. Mašyny stajać u joj kala dvuch dzion. Pra heta paviedamiŭ staršynia centralnaha kamiteta rasijskaha mižrehijanalnaha prafsajuza «Dalnabojščyk» Valer Vajtko.
Pavodle rasijskaha partała RBK, mytniki praviarajuć nie tolki hruzavyja, ale i lehkavyja aŭtamabili. Na sajcie Mytnaha kamiteta Biełarusi paviedamlajecca pra kanfiskacyju niezadekłaravanych juvielirnych vyrabaŭ u hramadzianina Kazachstana, jaki ruchaŭsia na Porshe Cayenne. A ŭ Rasonskim rajonie biełaruskija mytniki zaviarnuli ŭ Rasiju hruzavik z partyjaj bananaŭ, a taksama mikraaŭtobus sa śpirtam i cyharetami.
Alaksandr Łukašenka pastaviŭ Rasii faktyčny ŭltymatum: jon zapatrabavaŭ źniać najaŭnyja abmiežavańni ciaham dziesiaci dzion.
Mytnaha nadhladu na miažy Biełarusi i Rasii niama ad 2011 hoda, kali krainy zaklučyli Mytny sajuz.
Ciapier čytajuć
«Moža, bajaŭsia zastavacca ŭ šlubie sa mnoj, bo pracuje na BT». Nastaŭnica, jakaja źjechała praz danosy Bondaravaj, raspaviała pra razvod i žyćcio ŭ emihracyi1414
Kamientary