Hurt Karpatt z Paryžu praciahvaje prajekt partału Tuzin.fm i hramadzkaj kampanii «Budźma biełarusami!», u miežach jakoha zamiežnyja artysty pradstaŭlajuć pieśni na słovy biełaruskich paetaŭ. Francuzy vykanali pieśniu «Le chêne d'hiver» na słovy Ŭładzimiera Karatkieviča.
Karpatt ź niepadrobnym intaresam pastavilisia da prapanovy pakłaści na muzyku biełaruski vierš u pierakładzie na francuzskuju. «Heta prosta vydatnaja ideja abjadnać ludziej z roznych krainaŭ, adkryć im niešta novaje i padzialicca svaim z dapamohaj paezii, jakaja cudoŭna hučyć na jakoj zaŭhodna movie!», – kaža aŭtar piesień, hitaryst i vakalist hurta Fred Rała. Pierakład vierša Ŭładzimiera Karatkieviča «Zimovy dub» na francuzskuju movu zrabiła Łarysa Hijme, jakaja raniej pierakłała dla vydańnia ŭ hetaj krainie «Tutejšyja»Janki Kupały i pjesy sučasnych biełaruskich dramaturhaŭ. Francuzskija muzyki skarystali z łaskavaje zhodyLavona Volskaha asnoŭnuju temu klavišnych z aryhinalnaj versii pieśni na hetyja słovy, zapisanaj dla niavydadzienaha prajektu na vieršy Karatkieviča. Harmonija kupletaŭ, rytm udarnych, basu i kantrabasu naležyć aŭtarstvu Karpatt.
«Viadoma ž, ciapier dla mianie dub budzie nia tolki zialonym, ale i zimovym», – uśmichajecca Fred Roła i dadaje: «Paezija Karatkieviča – vielmi pryhožaja i vobraznaja, jana padajecca piaščotnaj ź vielmi kranalnaj naturalistyčnaj metafaraj». Muzyki majuć namier vykonvać hety tvor na svaich kancertach i marać syhrać jaje ŭ Biełarusi. Da słova, paryžanie ŭ nas byli ŭžo trojčy i majuć nadzvyčaj pryjemnyja ŭspaminy: «Biełaruś – kraina z raskošnaj pryrodaj i čaroŭnymi lasami. Nas tut padziviła najpierš nieŭtajmavanaja šalonaść ludziej, jakija biaskonca zdolnyja dzialicca svaimi pačućciami z sapraŭdnaj hłybinioj. Biełarusaŭ z francuzami jakraz abjadnoŭvaje hetaja ŭłaścivaść – prychilnaść da pačućciovaści, muzyki dy emacyjnaści. A jašče ŭ vas vielmi kranalnyja narodnyja śpievy», – kaža Fred ad imia ŭsiaho svajho hurta. Akrom jaho ŭ Karpatt uvachodziać Haetan Lera (hitara) i Erve Žehuso(kantrabas). Jany razam hrajuć z 2002 hodu. Pracujuć u žanry klasyčnaj francuzskaj pieśni, zapisali piać studyjnych albomaŭ i adzin kancertny, majuć pastajannyja hastroli pa ŭsioj Eŭropie, Azii dy Afrycy.
Tvor «Le chêne d'hiver» ŭ aryhinale zaviecca pa pieršym radku — «Straciŭ les svoj zimni čub…». Uładzimier Karatkievič napisaŭ jaho 21 listapada 1981, a vyjšaŭ vierš u paśmiarotnym zborniku tvorcy «Byŭ. Jość. Budu» (1986).
Prajekt «Global Reload» ładziać partał Tuzin.fm i hramadzkaja kampanija «Budźma biełarusami!». Jon źjaŭlajecca lahičnym praciaham prajektaŭ «Tuzin.Pierazahruzka» i «Budźma! Tuzin.Pierazahruzka.
