«Dzieci ŭžo pa padjezdach u susiedziaŭ prosiać makułaturu». Paśla navatarskich prapanoŭ ad Anatola Tozika pracy ŭ nastaŭnikaŭ stała jašče bolš.
«Treba zabaranić na zakanadaŭčym uzroŭni kamu b tam ni było ŭmiešvacca ŭ praces, prybrać sa škoły ŭsie lišnija dakumienty», — padsumoŭvaŭ užo były vice-premjer Anatol Tozik pracu hrupy pa analizie sistemy adukacyi jašče ŭ kastryčniku. Razam ź im adukacyju analizavali 36 čynoŭnikaŭ, kiraŭnikoŭ univiersitetaŭ i technikumaŭ.
U nastaŭnika ź minskaj škoły Jaŭhiena pracy tolki paboleła. Ciapier aproč «Nastaŭnickaj haziety» treba vypisvać vydańnie «Kamunist Biełarusi», a taksama sabrać bolš čym paŭtony makułatury za hod! Stolki i ŭ kvatery nie źmieściš.
«Skazali vypisać dva vydańni: «Juny ratavalnik» na kłas i hazietu «Kamunist Biełarusi» — na škołu. Makułatura pavialičvajecca z kožnym paŭhodździem. Pa 500-600 kiłahram ad kłasa pavinnyja zdavać kožny hod. Dzieci ŭžo pa padjezdach u susiedziaŭ prosiać makułaturu. Taksama treba, kab 60% ad škoły prajšło vakcynacyju ad hrypu. Davodzicca baćkoŭ uprošvać», — pieraličvaje dadatkovyja abaviazki nastaŭnik Jaŭhien.
Biełaruskaj movy na hadzinu bolš u škole nie stała, jak prapanoŭvaŭ kiraŭnik krainy Alaksandr Łukašenka. Ale raskład zaniatkaŭ dla adnaho kłasa prapanavali napisać pa-biełarusku. «Skazali pašyryć infarmacyjnuju prastoru na biełaruskaj movie. Naprykład, dla adnaho kłasa kab paviesili zaniatki na biełaruskaj movie. Taki prykład čynoŭniki pryvodzili. Navučalnyja i vychavaŭčyja mierapryjemstvy pa kultury Biełarusi, stendy», — tłumačyć Jaŭhien.
U nastaŭnika z Mahiloŭskaha rajona Alaksieja ŭ škole skasavali prymusovuju padpisku. Ale pavodle jaho infarmacyi, heta adzinkavy vypadak. «Heta datyčyć tolki našaj škoły, ja vypadkova daviedaŭsia. Jašče my ŭzdymali pytańnie, kab prajezd apłačvaŭsia tym, chto jeździć ź inšaha horada. Ale heta nie ŭviali, bo nie praduhledžana zakonam».
Vučni nastaŭnicy biełaruskaj movy Volhi ź Minska źbirajuć 35 kiłahram makułatury na čałavieka ŭ hod. Ale administracyja dazvalaje sabrać pałovu normy, łahodnyja… «Zbolšaha novaha ničoha nie ŭviali, ale i staroje nie prybrali», — kaža Volha.
U Ministerstvie adukacyi i ŭradzie nie paviedamili, kali buduć pryniatyja prapanovy pracoŭnaj hrupy Anatola Tozika i ci zapracujuć jany naohuł. Hetaja hrupa sabrałasia ŭ pačatku vieraśnia i ŭniesła prapanovy ŭžo ŭ kastryčniku. A naprykancy śniežnia Anatol Tozik pierastaŭ pracavać va Uradzie.
