Dziaržsakratarka ZŠA Kandaliza Rajs papiaredziła Tehieran, što niadaŭnija dziejańni iranskich kateraŭ u Persydzkaj zatocy byli pravakacyjnymi j niebiaśpiečnymi.
U interviju Arabskaj słužbie Bi‑bi‑si Rajs nahadała Iranu, što ŭ ZŠA dy ichnich chaŭruśnikaŭ surjoznyja intaresy ŭ rehijonie, i Vašynhton hatovy hetyja intaresy abaraniać.
Napiaredadni krynicy ŭ ministerstvie abarony ZŠA paviedamili, što ŭnačy z suboty na niadzielu piać iranskich chutkachodnych kateraŭ pravakavali try vajskovyja karabli ZŠA, nieadnarazova nabližalisia da ich i pieradavali pa radyjo, što majuć namier ich uzarvać.
Tehieran, u svaju čarhu, zajaviŭ, što havorka idzie pra štatnuju sytuacyju.
«Prablema była vyrašanaja paśla taho, jak abodva baki apaznali adzin adnaho», — zajaviŭ pradstaŭnik iranskaha MZS.
U interviju Rejter pradstaŭniki Pentahonu ŭdakładnili, što incydent adbyŭsia ŭ neŭtralnych vodach Armuskaj pratoki, jakaja łučyć Persydzskuju j Amanskuju zatoki.
Telekananał Si‑en‑en z spasyłkaj na ananimnuju vysokapastaŭlenuju krynicu paviedamiŭ, što amerykancy byli hatovyja adkryć ahoń.
«Ja idu na vas. Praz paru chvilinaŭ vy budziecie padarvanyja», — pracytavaŭ Si‑en‑en tekst adnoj ź iranskich radyjohram amerykancam.
Iranskija katery padychodziła na adlehłść u 200 metraŭ, i «litaralna ŭ samy momant, kali amerykanskija vajskoŭcy byli hatovyja adkryć ahoń» irancy razvaročvalisia j adychodzili, — raskazaŭ čynoŭnik Pentahonu ahienctvu Asašyejted pres.
Niekatoryja z krynic u Pentahonie adciemili prynaležnaść iranskich kateraŭ Korpusu vartaŭnikoŭ isłamskaj revalucyi — vajenizavanaj struktury kiroŭnaha ŭ Iranie isłamskaha duchavienstva.
Amerykanskija aficyjnyja asoby nazvali dziejańni iranskich kateraŭ nieaściarožnymi, nierazvažlivymi i patencyjna niesiabroŭskimi, a Bieły dom papiaredziŭ, što takija pravakacyjnyja akcyi zdolnyja pryvieści da niebiaśpiečnaha incydentu.
Stasunki miž Iranam i ZŠA zastajucca nadzvyčaj napružanymi, asabliva ŭ suviazi ź iranskaj jadravaj prahramaj.
Prablema iranskaha atamu, jak čakajuć, staniecca adnoj z tem pieramovaŭ u časie zaplanavanaha turne Džordža Buša pa cełym šerahu krain Bližniaha Ŭschodu.