16 studzienia ŭ Minsku anarchisty praviali sieryju akcyj u znak pratestu suprać dziejańniaŭ milicyi i KDB na kancercie 10 studzienia, a taksama ŭ znak salidarnaści sa svaimi aryštavanymi tavaryšami, jakija byli zatrymanyja na kancercie.
Jak paviedamlaje sajt «Anarchičny Čorny Kryž — Biełaruś», aŭtanomnyja hrupy sabralisia ŭ simvaličnych punktach horada, kab «vykazać svajo abureńnie nakont biespakaranaści pravaachoŭnych orhanaŭ i sudździaŭ». Jany sfatahrafavalisia na fonie Leninskaha RUUS, na fonie suda Leninskaha rajona i na fonie centra izalacyi pravaparušalnikaŭ z płakatam.
Taksama aktyvisty raspaŭsiudzili manifiest: «Hetymi akcyjami my chočam źviarnucca da ŭsich karalnych orhanaŭ. Vy sprabujecie nas zapałochać, ale ŭ vas heta nie atrymlivajecca. Kancerty buduć praciahvacca, ludzi buduć i dalej zajmacca pratestavaj dziejnaściu. Salidarnaść macniejšaja za strach. Naša pieršaja simvaličnaja akcyja pryśviačajecca asabista ŭsim AMAPaŭcam, jakija vykonvali zahad, i KDBšnikam, jakija jaho addavali, a taksama ich padchalimam ź Leninskaha RUUS, jakija akazali im poŭnaje sadziejničańnie».
Druhoj akcyjaj anarchisty pieradajuć «asablivaje pryvitańnie» sudździ Leninskaha suda, jaki sudziŭ ich tavaryšaŭ. «Paśla adnaho zakrytaha kancerta buduć pravodzicca dva. Na kožnaha asudžanaha niazhodnaha budzie prychodzić niekalki «novieńkich», i vy sami hetamu sadziejničajecie. Čym macniejšyja vašy represii, tym bolš lutaje naša supraciŭleńnie! Treciaja akcyja pryśviačajecca našym aryštavanym tavaryšam, a taksama ŭsim, kaho dziaržava ličyć ekstremistami tolki za ich pierakanańni. Vy nie adny, nas šmat, my z vami!», – havorycca ŭ manifieście.
Jak paviedamlałasia raniej, viečaram 10 studzienia supracoŭniki AMAP uvarvalisia na pank-kancert u minski kłub «Piraty». Jany pastavili bolš za sto ŭdzielnikaŭ i hledačoŭ kancerta i piersanał kłuba tvaram da ściany i prymusili padniać ruki. Milicyja pierapisała źviestki hledačoŭ i muzykantaŭ, abšukała i źniała niekatorych na videakamieru. Usio heta doŭžyłasia paŭtary hadziny, zatym supracoŭniki pravaachoŭnych orhanaŭ pakinuli kłub. Jany arhumientavali svaje dziejańni tym, što nibyta pastupiŭ zvanok, što ŭ kłubie raspaŭsiudžvajucca narkotyki.
Try čałavieki byli zatrymanyja za raspaŭsiudžvańnie ekstremisckich materyjałaŭ i drobnaje chulihanstva. 12 studzienia ŭ sudzie Leninskaha rajona prajšoŭ sud pa art. 17.1 (drobnaje chulihanstva), materyjały pa art. 17.11 (ekstremizm) adpravili na dapracoŭku. Dva čałavieki byli asudžanyja na 10 sutak, dziaŭčyna — na štraf u pamiery 10 b.v. za niecenzurnuju łajanku ŭ kłubie. Taksama viadoma, što milicyja pačała apracoŭvać sabranyja śpisy i prychodzić da naviedvalnikaŭ pa miescy žycharstva z pytańniami.
