Lipovaja aleja ŭ vioscy Jakušoŭka — adzinaje, što całkam zachavałasia ad majontku siamji Kalinoŭskich. Jaje pasadziŭ Kastuś Kalinoŭski razam z bratam Viktaram. Budučamu revalucyjanieru było tady ŭsiaho 10 hod.
Aproč alei jość pamiatny znak i fundament domu Kalinoŭskich. Jaho vyjavili miascovyja krajaznaŭcy pa archiŭnych źviestkach. Vioska Jakušoŭka — ciapier samaje papularnaje miesca ŭ Śvisłackim rajonie. Siudy pryjaždžajuć navat z Ameryki.
Bijahrafiju kiraŭnika sialanskaha paŭstańnia 1863 h. vyvučajuć vučni miascovaj himnazii jahonaha imia. Kažuć: zvańnie abaviazvaje. Dziakujučy ich vysiłkam udałosia adnavić vonkavy vyhlad majontka.
Kaciaryna Saraj — vučanica himnazii imia Kalinoŭskaha: «Z dapamohaj śvisłackich mastakoŭ i archiŭnych źviestak vučniam 11 klasy himnazii udałosia stvaryć ahulny vyhlad majontku Kalinoŭskich. Sałamianaja stracha i kust bezu ŭ dvary — usia terytoryja była adharodžana»
Vyniki svaich pošukaŭ u archivach Polščy i Litvy užo raźmiaścili vučni himnazii na specyjalnym sajcie. Siamikłaśnik Siarhiej abahulniaje uvieś materyjał i redahuje sajt u Internecie.
Sioleta ŭ Śvisłačy rychtujucca śviatkavać 170‑hadovy jubilej Kalinoŭskaha (Kalinoŭski naradziŭsia 2 lutaha 1838 h. Čakajecca šmat turystaŭ. Specyjalna da ich pryjezdu himnazistami rychtujucca admysłovyja turystyčnyja maršruty pa Biełavieskaj puščy z zajezdam u Jakušoŭku. Hetyja maršruty byli spačatku vyprabavanyja na sabie.
Žychary Śvisłačy ŭpeŭnienyja — moda na Kalinoŭskaha budzie zaŭsiody. Mienavita tamu śledapyty rychtujuć prajekt rekanstruncyi majontka znakamitaha ziemlaka.