U Babrujsku na pieršym pasiadžeńni Moładzievaha parłamienta prahučała inicyjatyva ŭ abaronu biełaruskaj movy. Navučenka himnazii № 1 Anhielina Bialasava prapanavała padvyšać na bał adznaki tym vučniam, jakija adkazvajuć pa-biełarusku.
Prapanova junaj parłamientarki nie znajšła padtrymki ŭ prysutnych na pasiadžeńni čynoŭnikaŭ. U prapanovie Anhieliny słužboŭcy ŭhledzieli dyskryminacyju, spasłaŭšysia na toje, što ŭ Biełarusi dźvie dziaržaŭnyja movy. Sama ž dziaŭčyna ličyć, što padtrymlivać biełaruskuju movu i padachvočvać, kab na joj havaryli, nieabchodna. Vučni, kaža jana, pačali b achvotniej vyvučać biełaruskuju movu i prajaŭlać inicyjatyvu dziela jaje pašyreńnia.
«Dzieci pačali b vučyć biełaruskuju movu, kab atrymlivać vyšejšuju adznaku», — ličyć junaja parłamientarka.
Anhielina zaŭvažaje: na pasiadžeńni parłamienta pra biełaruskuju movu zhadała tolki jana adna. Ličyć, što ciapierašni stan movy harotny. Sabie dziaŭčyna pastanaviła, što zojmiecca vyrašeńniem hetaj prablemy.
«Nie havorać na biełaruskaj movie i nie ŭsie viedajuć biełaruskuju movu», — kaža jana.
«Ja nikoli raniej nie zadumvałasia pra hetuju prablemu. Mabyć, tamu, što nie rasła ŭ tym asiarodździ, u jakim ludzi havaryli pa-biełarusku. Dyj vielmi mała ja bačyła ludziej, jakija havorać na hetaj movie. Kali ž ja pačała adčuvać u siabie patryjatyčny duch, to pačała zadumvacca ab hetaj prablemie».
«Bieź viedańnia biełaruskaj movy biełarus nie moža ličyć siabie patryjotam»,—– upeŭniena zajaŭlaje Anhielina.
«Heta vielmi važnaja častka našaj kultury. Kožny hramadzianin Biełarusi pavinien lubić biełaruskuju movu — tamu što heta naša rodnaja mova. Kožny, chto ličyć siabie sapraŭdnym patryjotam svajoj radzimy, pavinien viedać rodnuju movu. Ja tak liču».
Anhielina nie ŭtojvaje, što nie časta davodzicca joj hutaryć na biełaruskaj movie. Pryznajecca, što havaryć pa-biełarusku składana — nie staje praktyki:
«Ja havaru na biełaruskaj movie tolki z tymi, chto blizki mnie, — siamiejniki i najlepšyja siabry. My sprabujem raźvivać svaje viedy ŭ biełaruskaj movie. Ja viedaju dobra hramatyku biełaruskaj movy, ale ciažka havaryć. Ja dumaju na rasiejskaj movie, i mnie treba pierakłaści spačatku, kab havaryć pa-biełarusku. I mnie ciažka havaryć. Niekatoryja zusim nie viedajuć hetaj movy. Treba rabić usio, kab ludzi chacieli viedać jaje».
Maci Anhieliny Luboŭ Stanisłavaŭna nie była suprać hutarki dački z žurnalistam. Zaznačyła, što ŭchvalaje ciahu Anhieliny da biełaruskaści. Kaža, što ŭ jaje heta ź dziacinstva.
Anhielina vučycca ŭ fizika-matematyčnym kłasie, vydatnica. Sioleta na abłasnoj pradmietnaj alimpijadzie ŭ Mahilovie ŭziała dypłom. Paŭdzielničała ŭ intelektualnym biełaruskamoŭnym spabornictvie «Biełaruskaje piaciborstva», jakoje pravodzić abłasnaja arhanizacyja Tavarystva biełaruskaj movy. Kaža, što ŭziała ŭdzieł, kab vyznačyć uzrovień svaich viedaŭ na biełaruskaj movie — nie tolki ŭ matematyčnych navukach, ale i ŭ humanitarnych dyscyplinach.
U Biełarusi prajekty pa stvareńni Moładzievaha parłamienta realizujucca ŭ miežach hłabalnaj inicyjatyvy JUNISIEF «Horad, pryjazny da dziaciej». Stvarajucca jany pry harsavietach.
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary