Alaksandr Łukašenka ŭ chutkim časie maje namier pryniać spravazdačy ab pracy ŭsiaho siłavoha błoka. Pra heta, jak paviedamlaje pres-słužba kiraŭnika dziaržavy, jon zajaviŭ, prymajučy 17 lutaha z dakładam hienieralnaha prakurora Alaksandra Kaniuka.
«U chutkim časie my znojdziem i formu, i mahčymaść pasłuchać uvieś siłavy błok, a moža, navat u prakuratury źbiaromsia, bo mnohija pytańni zvodziacca na vas, na prakuratury, vy ŭvohule kantralujecie ich zakonnaść dziejańniaŭ», — skazaŭ jon.
Jon pacikaviŭsia vynikami aptymizacyi orhanaŭ prakuratury. «My z vami damaŭlalisia, što da 1 studzienia my zakončym hetu ŭsiu reformu arhanizacyjnaj struktury prakuratury. Na što my siońnia vyjšli? Što ŭ nas nasamreč atrymlivajecca?» — spytaŭ Łukašenka. Pavodle słoŭ Alaksandra Kaniuka, praces aptymizacyi orhanaŭ prakuratury zavieršany. Stvorana kampaktnaja sistema, jakaja składajecca z troch stupieniaŭ: prakuratury rajona, prakuratury vobłaści i hienieralnaj prakuratury.
Łukašenka taksama zakranuŭ pytańni ab kryminahiennym stanoviščy ŭ krainie. Jon nahadaŭ, što za apošnija hady ŭ Biełarusi kolkaść źniavolenych była skaročana napałovu: prykładna z 60 tys. da krychu bolš za 30 tys. «U suviazi z hetym ci niama ŭ nas paharšeńnia kryminahiennaha stanovišča?» — pacikaviŭsia Łukašenka. Jak paviedamiŭ hienieralny prakuror, nazirajecca źnižeńnie kolkaści pravaparušeńniaŭ.
Kiraŭnik dziaržavy prainfarmavany, što Hienieralnaja prakuratura maje namier bolš aktyŭna zaniacca debitorskaj zapazyčanaściu eksparcioram. Tut isnuje pryncypovaja damoŭlenaść z hienieralnym prakuroram Rasii ab sumiesnych dziejańniach.
Hienprakuratura Biełarusi maje namier taksama aktyvizavać pracu ŭ dačynieńni da pravierki efiektyŭnaści vykarystańnia abstalavańnia, nabytaha za košt biudžetu i dziaržpadtrymki. Tak, płanujecca, što ŭ chutkim časie Hienprakuratura i Kamitet dziaržaŭnaha kantrolu praviaduć naradu, dzie buduć vypracavanyja asnoŭnyja kirunki hetaj pracy.
Jašče adnym pryjarytetnym vidam dziejnaści hienieralnaj prakuratury ŭ 2015 hodzie stanie nahlad u śfiery padatkovaha zakanadaŭstva.
Ciapier čytajuć
Na mitynhu ŭ Vilni zatrymali pravakatara. A Cichanoŭski zajaviŭ pra namier dabivacca sustrečy ź Zialenskim1
Kamientary