Pamior Kłark Ułafsan — hieroj historyi, jakaja dała śvietu paniaćcie «stakholmski sindrom»
27 červienia na 79-m hodzie žyćcia ŭ šviedskim horadzie Arvika pamior Kłark Ułafsan — złačyniec, imia jakoha źviazvajuć z uźniknieńniem viadomaha psichałahičnaha i palityčnaha paniaćcia «stakholmski sindrom», piša «Mieduza».
Ułafsan staŭ viadomy 23 žniŭnia 1973 hoda, kali jahony były sukamiernik Jan-Eryk Ulsan uziaŭ zakładnikaŭ padčas sproby rabavańnia banka Kreditbanken na płoščy Norrmalmstorh u Stakholmie. Ulsan zapatrabavaŭ dastavić da jaho ŭ bank Ułafsana — i razam jany ŭtrymlivali čaćviarych zakładnikaŭ na praciahu šaści dzion.
Padčas zachopu złačyncy davoli humanna abychodzilisia ź ludźmi: supakojvali, davali zvanić damoŭ, vypuskali na pavietra pry kłaŭstrafobii. Adnoj z zakładnic nastolki nie davała spakoju palicejskaja apieracyja, što jana patelefanavała premjer-ministru Ułafu Palmie i skazała, što bolš baicca palicyi, čym złačyncaŭ.
Kali zachop skončyŭsia, usie vyžyli — biez surjoznych traŭmaŭ. Zakładniki navat abdymalisia z zachopnikami pierad ich zdačaj palicyi.
Kab rastłumačyć takija pavodziny zakładnikaŭ, psichijatr Nils Biejerut vykarystaŭ paniaćcie «identyfikacyja z ahresaram» — viadomaje z rabot Fierency i Anny Frejd. Mienavita Biejerut pieršym nazvaŭ kankretny vypadak «norrmalmstorhskim sindromam», jaki chutka staŭ viadomy jak stakholmski — z-za ciažkaści vymaŭleńnia.
Biejerut nie ličyŭ sindrom dyjahnazam — heta była mietafara, jakaja chutka atrymała suśvietnuju viadomaść praz šyroki miedyjny rozhałas. Z časam termin pačali šyroka vykarystoŭvać u palitycy i žurnalistycy.
Ciapier čytajuć
Za zabojstva čałavieka ŭ IČU Barysava aryštavali dvuch zekaŭ-recydyvistaŭ i 26‑hadovaha milicyjaniera Klaščonka4
Za zabojstva čałavieka ŭ IČU Barysava aryštavali dvuch zekaŭ-recydyvistaŭ i 26‑hadovaha milicyjaniera Klaščonka
«Vyzvalali niemcaŭ ad fašyzmu, a sami zastavalisia ŭ tym ža dziarmie». Apublikavana treciaja častka ŭspaminaŭ Ryhora Biarozkina pra savieckija represii2626
Kamientary