«Adolf Pucin»: u Vienhryi prajšła akcyja pratestu suprać vizitu prezidenta Rasii
U Budapiešcie kala dźviuch tysiač čałaviek vyjšli na demanstracyju pratestu suprać vizitu ŭ Vienhryju prezidenta Rasii Uładzimira Pucina.
Demanstracyja ŭ Budapiešcie prajšła ŭviečary ŭ paniadziełak. Udzielniki akcyi pratestu nieśli płakaty «Pucinu — nie, Jeŭropie — tak!»,, «Adolf Pucin», «Svabodu Nadziei Saŭčanka!».
Mnohija ŭdzielniki demanstracyi pratestu ŭ Budapiešcie zajaŭlajuć, što bolš ciesnyja adnosiny z Maskvoj vyklikajuć u ich niepakoj, bo heta moža pryvieści da «paŭzučaj pucinizacyi» Vienhryi.
Vizity rasijskaha prezidenta ŭ krainy ES praktyčna spynilisia ŭ suviazi z kanfliktam na ŭschodzie Ukrainy. Heta pieršy z červienia 2014 hoda vizit rasijskaha lidara ŭ krainu Jeŭrapiejskaha Sajuza.
Pavodle ahladalnikaŭ, rasijski prezident choča prademanstravać, što maje sajuźnikaŭ siarod krain, jakija ŭvachodziać u ES i NATA.
Vienhryja padtrymlivaje sankcyi, nakładzienyja Jeŭrapiejskim Sajuzam na Rasiju ŭ suviazi z kanfliktam na ŭschodzie Ukrainy, adnak adnačasova zajaŭlaje pra vielmi kiepskija nastupstvy hetych sankcyj.
U 2014 hodzie premjer-ministr Vienhryi Viktar Orban skazaŭ, što ES «pakaraŭ samoha siabie», abmiežavaŭšy handlovyja adnosiny z Maskvoj.
Kala pałovy impartavanaha Vienhryjaj pryrodnaha hazu pastupaje z Rasii, i ciapier Vienhryja chacieła b zaklučyć z Maskvoj damovu ab doŭhaterminovych pastaŭkach hazu. Ciapierašni dahavor zakančvajecca sioleta.
Kamientary