«Marka» moža nie vykanać abaviazacielstvaŭ, uskładzienych na kampaniju ŭkazam prezidenta — stvareńnie abutkovaha chołdynhu da 2016 hoda znachodzicca pad pahrozaj.
Dałučeńnie stratnych pradpryjemstvaŭ da paśpiachovych i stvareńnie takim šlacham bujnych chołdynhaŭ było chitom pramysłovaj palityki minułaha ŭrada Michaiła Miaśnikoviča. Nie abyšła dola hetaja i lidara abutkovaj pramysłovaści — kampaniju «Marka».
Ubačyŭšy, što pradpryjemstva paśpiachova spraviłasia z paviešanym na jaho jašče ŭ 2008 hodzie zavodam «Čyrvony Kastryčnik», ułady vyrašyli dadać da ich i Viciebski futravy kambinat. Tak u 2013 hodzie naradziŭsia chołdynh «Biełaruskaja harbarna-abutkovaja kampanija «Marka».
Adnak stratny futravy kambinat byŭ addadzieny «Marka» nie prosta tak, a razam z maštabnymi abaviazalnictvami. Zhodna z ukazam prezidenta, chołdynh pavinien pravieści madernizacyju kambinata, ukłaŭšy 70 młn dalaraŭ. Uvod u ekspłuatacyju pradpryjemstva zapłanavany na kastryčnik 2016-ha.
Paralelna pavinna pravodzicca madernizacyja ŭsiaho chołdynhu (6 pradpryjemstvaŭ) — dedłajn u 2017 hodzie. «Marka» abaviazana pavialičyć abjom vytvorčaści abutku da 5 młn par u hod. Rentabielnaść prodažaŭ pry hetym pavinna być nie mienš za 12%, vyručka ad realizacyi pradukcyi na adnaho rabotnika — 40 tysiač dalaraŭ. Zapłanavana stvaryć 926 novych pracoŭnych miescaŭ, napałovu źnizić impartny składnik pry vytvorčaści abutku i pavialičyć abjom ekspartu.
Ahulny abjom inviestycyj u realizacyju ŭsiaho prajekta ukazam aceńvajecca ŭ 120 młn dalaraŭ. Zhodna z dakumientam, prajekt finansujecca jak ułasnymi srodkami chołdynhu, tak i bankaŭskimi kredytami pry padtrymcy dziaržavy.
U kancy minułaha hoda ŭładalnik «Marka» Mikałaj Martynaŭ zajaŭlaŭ, što voś-voś atrymaje kredyty. Adnak nieŭzabavie stała viadoma, što biznesmien adčuvaje ciažkaści z pryciahnieńniem srodkaŭ.
Tak, Mikałaj Martynaŭ źviartaŭsia z adpaviednaj skarhaj da staršyni Viciebskaha abłvykankama Mikałaja Šarstniova. Kampanija zajaŭlała, što dla taho, kab madernizavać pradpryjemstva ŭ adviedzieny termin, užo z krasaviku 2015-ha treba pačać kredytavańnie. Inakš pracy spyniacca.
Hetuju ž prablemu jon ahučyŭ na pasiadžeńni Rady pa raźvićci pradprymalnictva, dzie jaho vysłuchali staršynia rady Piotr Prakapovič i vice-premjer Vasil Maciušeŭski.
Pa słovach biznesmiena, pytańnie finansavańnia stoparycca na ŭzroŭni bankaŭ.
«Siońnia my ŭziali na siabie śmiełaść, moža być jana navat na miažy hłupstva, budaŭniča-mantažnyja raboty častkova prafinansavać u valucie, — skazaŭ kiraŭnik chołdynhu. — Ale navat u valucie pačynajucca niejkija pieraškody. My źbiralisia tydzień tamu — była adna staŭka pa pracentach, učora — užo značna vyšejšaja».
Na dumku Mikałaja Martynava, banki śpiecyjalna tak siabie pavodziać, kab zusim nie pierachodzić da finansavańnia.
«Ale niejkaja miaža pavinien być. Jość ukaz, tam prapisany staŭki — i ŭ valucie, i ŭ rublach», — aburajecca biznesmien.
«Banki siońnia — heta niedatykalnaja kasta, da ich nielha padyści, — zajaviŭ kiraŭnik «Marka». — Ale jany, u rešcie rešt, taksama ŭdzielniki hetaha rynku. Ja prajšoŭ usie banki i ŭ Nacbanku byŭ. I baču: urad im — nie ŭkaz, ukaz prezidenta — taksama nie ŭkaz».
Biznesmien zajaviŭ, što bačyć vykanańnie prajekta tolki ŭ tym vypadku, kali budzie vykanana «taja častka, jakaja źviazanaja z kredytnaj palitykaj našaj dziaržavy». Jon raźličvaje na ŭmiašańnie ŭrada ŭ vyrašeńnie prablemy.
