Chutka pabačyć śviet «Premjer Tuzin‑2007»

Novy «Premjer» maje vyjści ŭ padvojnym multymedyjnym farmacie — ahułam 42 pieśni, što padzielenyja na dźvie sekcyi.

Za čatyry hady pracy muzyčnaha partału «Tuzin Hitoŭ» na jahonych staronkach było pradstaŭlena bolej za 300 novych biełaruskich piesień. A kali dadać siudy blizu 100 recenzijaŭ na novyja ajčynnyja płyty, dyk atrymajecca ci nia poŭny žyćciapis sučasnaj ajčynnaj alternatyŭnaj muzyki. Svajeasablivaj piesiennaj spravazdačaj minułaha 2007 hodu stała čarodnaja składanka muzyčnaha partała «Premjer Tuzin‑2007», źjaŭleńnie jakoj u prodažu čakajecca ŭžo pry kancy studzienia.

Praciahvajučy tradycyi papiarednich «tuzinoŭskich» vydańniaŭ, novy «Premjer» maje vyjści ŭ padvojnym multymedyjnym farmacie — ahułam 42 pieśni, što padzielenyja na dźvie sekcyi.

Pieršaja dvanaccadka pieśniaŭ vyznačanaja vynikovym słuchackim hałasavańniem u papularnym hit‑paradzie «Tuzina Hitoŭ». Zbolšaha hetaja sekcyja vyhladaje dosyć tradycyjna — u spravazdačny skład lepšych piesień 2007 hodu ŭvajšli novyja hity viadomych rokavych hrupaŭ N.R.M. (darečy ich pieśnia «Miensk‑Minsk» była pryznanaja za pieśniu hodu na «Tuzinie»), Krama, ZET, IQ48. Niekatoraj niečakanaściu staŭ vychad u lik «finalistaŭ» bluzavaj kamandy NESTARy Band, art‑folkavaj OSIMIRA i reinkarnavanych eks‑Cmokaŭ — hurta Band A. Taksama na mierkavańnie słuchačoŭ vartymi pieršaj «dvanaccadki» stała tajamničaja kamanda Piatra Jełfimava PitBull, siaredniaviečny «Rokaš», a taksama biarozaŭski :B:N:, mahiloŭski Tav.Mauzer, homielski «Ban‑Žvirba».

Vahomy dadatak da pieršaj dvanaccadki — MP3‑cekcyja, što ŭtrymlivaje jašče 30 najbolš cikavych pieśniaŭ 2007 hodu z hit‑paradu «Tuzina Hitoŭ».

Aŭtarami muzyčnych vynikaŭ hodu na «Tuzinie Hitoŭ» stali nia tolki naviedniki partału (pa statystyčnych źviestkach ich kolkaść ciaham 2007 hodu skłała blizu 200 000 čałaviek). Tradycyjna da padviadzieńnia vynikaŭ redakcyjaj zaprašajucca viadomyja i aŭtarytetnyja biełaruskija muzyčnyja analityki. Hetym razam vyznačać lepšych dapamahali pradstaŭniki ŭsich ajčynnych łejbłaŭ — Viktar Holcaŭ (Go‑Records), Vital Supranovič (BMAgroup), Uładzimier Maksimkaŭ (Vigma), Viačasłaŭ Hulevič (Novaja muzyčnaja kampanija), Mikałaj Sapunoŭ (West Records). Muzyka farmatu «Tuzin Hitoŭ» siońnia pradstaŭlena nia tolki štohadovymi paśpiachovymi CD‑składankami («Premjer Tuzin‑2007» staŭ užo treciaj pa liku). I nia tolki bujniejšym lehalnym sieciŭnym kataloham biełaruskamoŭnych piesień u farmacie MP3, ź jakoha štomiesiac fiksujecca blizu 50 000 spampoŭvańniaŭ trekaŭ. Muzyka ad «Tuzina Hitoŭ» siońnia hučyć na radyjo «Racyja», taksama viaducca pieramovy nad prajektam videa‑ŭvasableńnia «Tuzina» na TV‑kanale «BiełSat».

Redakcyja muzyčnaha partału «Tuzin Hitoŭ» zaŭždy padkreślivała, što hałoŭnaj metaj dziejnaści ich internet‑prajektu źjaŭlajecca anijak nie vyznačeńnie «lepšych ź lepšych», a najpierš, prapahanda sučasnaj biełaruskamoŭnaj muzyki i stvareńnie efektyŭnych mahčymaściaŭ vyjścia da słuchačoŭ dla maładych vykanaŭcaŭ. Razam z tym prazrystaść, uzvažanaść i hruntoŭnaść padviadzieńnia muzyčnych vynikaŭ razam z naviednikami i razmaitymi muzyčnymi ekspertami daje padstavy razhladać «Premjer Tuzin» jak abjektyŭnuju i niezaležnuju muzyčnuju premiju. Premiju, što mahčyma navat dyktuje «šort‑list» samych bujnych muzyčnych rokavych festavalaŭ i karanacyjaŭ. Premiju, što pretenduje stać nieŭzabavie hałoŭnaj alternatyŭnaj muzyčnaj cyrymonijaj, niachaj pakul i internetavaj.

Wiecier Mechaniczny, «Tuzin Hitoŭ»

• 0
• 0
• 0
• 0
• 0
• 0
• 0
• 0