Jeŭrasajuz vydzieliŭ 5 młn jeŭra na realizacyju prajekta «Sadziejničańnie pierachodu Respubliki Biełaruś da «zialonaj «ekanomiki». Prajekt realizujecca Prahramaj raźvićcia AAN, nacyjanalny vykanaŭca — Ministerstva pryrodnych resursaŭ i achovy navakolnaha asiarodździa. Pra heta na prezientacyi prajekta 31 sakavika paviedamiła jaho kiraŭnik Volha Čabroŭskaja.
Pavodle jaje słoŭ, prajekt raźličany na try hady i ŭklučaje try asnoŭnyja kampanienty. Pieršy kampanient ujaŭlaje saboj infarmacyjnuju kampaniju, nakiravanuju na roznyja metavyja hrupy — darosłych, dziaciej i ludziej stałaha ŭzrostu. U pryvatnaści, u Biełarusi płanujecca pravieści ekałahičny forum i kruhłyja stały pa «zialonaj» ekanomicy, raspracavać tematyčnyja kampjutarnyja hulni i mabilnyja prahramy, stvaryć elektronnuju «zialonuju» kartu, na jakoj buduć adznačany arhanizacyi, što źbirajuć i sartujuć adchody na asnovie «zialonych» pryncypaŭ. Akramia taho, płanujecca zakupić ekałahičny transpart (elektramabili) u Nacyjanalny historyka-kulturny muziej-zapaviednik «Niaśviž», a taksama stvaryć infarmacyjnyja ekałahičnyja centry ŭ zakaźnikach «Prybužskaje Paleśsie» i «Śviciazianski».
Druhi kampanient prajekta ŭklučaje realizacyju ŭ rehijonach čatyroch piłotnych prajektaŭ, zasnavanych na pryncypach «zialonaj» ekanomiki: arhanizacyju vytvorčaści ofisnaj papiery z druhasnych resursaŭ u Barysavie (Minskaja vobłaść) i hłybokaj pierapracoŭki saprapielu — u Žytkavičach (Homielskaja vobłaść), stvareńnie kompleksu pa pierapracoŭcy draŭnianych adchodaŭ u Breście i hadavalnika dla vyroščvańnia ptušak ciecierukovych parod — u zakaźniku «Nalibocki».
Treci kampanient uklučaje pracu ź niaŭradavymi arhanizacyjami. «U nas vyłučana asobnaja suma srodkaŭ na hranty hramadskim arhanizacyjam, jakija buduć vydavacca pad «zialonyja» inicyjatyvy. Prajekty mohuć raspracoŭvacca sumiesna ź dziaržaŭnymi orhanami, biźnies-supolnaściu, ale padavać ich pavinny hramadskija arhanizacyi», — adznačyła Čabroŭskaja. Infarmacyja pra konkurs prajektaŭ źjavicca ŭ bližejšyja miesiacy.
U Maskvie mužčyny masava sprabujuć znajomicca, macajučy dziaŭčat za jahadzicy. Tak zahadaŭ rabić seks-koŭč ź Biełarusi8
Kamientary