Słuchańni pa «Frandesie» dla hałački
17 studzienia ŭ Biarozie (Bieraściejskaja vobłaść) adbylisia hramadzkija «słuchańni» pra vytvorčaść pestycydaŭ na zamiežnym pradpryjemstvie «Frandesa», jakoje było adčynienaje pobač ź Biarozaju letam minułaha hodu.
Pa praŭdzie kažučy, «słuchańniami» toje mierapryjemstva, jakoje rajonnyja ŭłady razam z ułaśnikam i administracyjaj pradpryjemstva «Frandesa» vymušanyja byli pravieści pad ciskam pratestaŭ niemałoj častki žycharoŭ rajonu, nazvać davoli składana. Bo arhanizatary «słuchańniaŭ» nie dali mahčymaści prysutnym pasłuchać arhumenty apanentaŭ «Frandesy».
Były nampalit vajskovaj častki sp. Uładzimier Kaśjanaŭ, jakomu daručyli vieści mierapryjemstva pad nazvaju «słuchańni», umieła, pa‑nampali¬taŭsku, nadaŭ «słuchańniam» formu adkazaŭ na pytańni. U vyniku tyja, chto pryjšoŭ na hetaje mierapryjemstva, mahli tolki zadavać svaje pytańni nakont «Frandesy», na jakija adkazvali ŭłaśnik «Frandesy» Barys Frycalis, inšyja pradstaŭniki administracyi pradpryjemstva, navukoŭcy z Nacyjanalnaj akademii navuk, jakija z «Frandesaju» supracoŭničajuć, a taksama pradstaŭniki roznych dziaržaŭnych ustanovaŭ z rajonu, vobłaści i stalicy.
Sproby niekatorych z prysutnych (naprykład, spn. Tamary Ščapiotkinaj, a taksama akademika Ivana Nikitčanki, jaki ciapier zajmajecca pytańniami ekalohii i specyjalna pryjechaŭ na słuchańni ź Miensku) vykazać svajo asabistaje mierkavańnie nakont niebiaśpieki takoj vytvorčaści kala Biarozy «demakratyčna» abryvalisia viadoŭcam mierapryjemstva. Jon prasiŭ «zadavać pytańnie».
Jon ža, a taksama sp. Hienadź Kuryłovič, kiraŭnik idealahičnaha adździełu rajvykankamu, jaki padnosiŭ mikrafon tym u zali, chto chacieŭ zadać pytańnie albo davaŭ adkaz, dazvalali sabie davać kamentary adnosna samich pytańniaŭ i asobaŭ, što ich zadavali (maŭlaŭ, nu, kolki ŭžo hetaja spn. Ščapiotkina budzie zadavać svaje pytańni).
Darečy, «słuchańni» byli arhanizavanyja ŭ pracoŭny dzień a 14‑j. Tak što za vyniki hałasavańnia i «karcinku» možna było asabliva nie chvalavacca. Ale vyrašyli pierastrachavacca i pravieści mierapryjemstva amal što ŭ najlepšych savieckich tradycyjach. Publiku ž padabrali adpaviednuju, jakoj dazvolena było i pracoŭny čas skarystać biaz strachu być pakaranymi za prahuł.
Vybranuju schiemu trochi złamaŭ sp. Jury Hubarevič. Jak na jaho ni šykali z zali: chto jon taki, dzie jon ciapier žyvie i kim pracuje, — jon z padrychtavanym na piać chvilinaŭ vystupam umudryŭsia navat vyjści da mikrafonu na trybunu. Adnak viadoŭca nia daŭ jamu mahčymaści dahavaryć. Maŭlaŭ, try chviliny na vystup skončylisia. Prosiš tryccać sekundaŭ, kab začytać vielmi važnuju infarmacyju, što tyčycca zdaroŭja žycharoŭ Biarozy, davaj jaje ŭ prezydyjum — my pačytajem. Namieśnik staršyni Partyi BNF nia staŭ učyniać bojki za mikrafon z čałaviekam našmat starejšym za jaho (milicyjanty, napeŭna, užo byli padrychtavanyja) i musiŭ syści sa sceny.
Tym nia mienš, inicyjatary zboru podpisaŭ suprać «Frandesy» šmat čaho damahlisia. Pryciahnuli pilnuju ŭvahu dziaržaŭnych ustanovaŭ. Damahlisia prypynieńnia vytvorčaści na pradpryjemstvie, pakul nia budzie zavieršanaja jaho ekalahičnaja ekspertyza. T. Ščapiotkina ahučyła ŭsio ž svaje zaŭvahi pra toje, što ŭ budučyni pradpryjemstva planuje vytvorčaść bolš škodnych rečyvaŭ, čym ciapierašni «Škvał». Na što B. Frycalis tolki nervova adkazvaŭ: «Nu što Vy ciapier havorycie pra 16‑ty hod. My što, zaraz budziem abmiarkoŭvać 16‑ty hod?» (Majecca na ŭvazie pusk treciaha cechu (u 2012—2016 hh.), u jakim budzie naładžany vypusk niekalkich vidaŭ aktyŭnych rečyvaŭ dla vytvorčaści pestycydaŭ). Padumałasia, što nia vielmi ŭpeŭniena adčuvaje siabie sp. Frycalis, pry tym, što ŭžo na ciapierašni čas try tysiačy hramadzian Biarozaŭskaha rajonu skazali svajo kateharyčnaje «nie», padpisaŭšysia suprać «Frandesy». Tyja 148 «za», zdabytyja pa viadomych technalohijach dla hałački, na jakija spasyłajecca ciapier hramadzianin soniečnaha Izrailu — kamaryny pisk.
Tak zvanyja «słuchańni» skončylisia, ale baraćba za vydaleńnie «Frandesy» ź Biarozaŭskaha rajonu, jaki ŭ 2007 h. staŭ rekardsmenam u Bieraściejskaj vobłaści pa vykidzie zabrudžvalnych rečyvaŭ ad stacyjanarnych krynic, budzie praciahvacca.
Kamientary