Staršynia prafsajuza rabotnikaŭ Jeŭrapiejskaha humanitarnaha ŭniviersiteta (EHU, Vilnius) Kanstancin Tkačoŭ vykazaŭ nadzieju «pierazapuścić praces pieramoŭ» z administracyjaj VNU. Pra heta jon zajaviŭ, kamientujučy pryznačeńnie amierykanskaha prafiesara Devida Polika na pasadu rektara EHU.
Dahetul, pavodle słoŭ Tkačova, pracoŭnyja adnosiny z šeraham vykładčykaŭ nie pryviedzienyja ŭ adpaviednaść ź litoŭskim zakanadaŭstvam, niahledziačy na zapeŭnivańni administracyi. Tak, u EHU niama kalektyŭnaha dahavora, «najaŭnaść jakoha, z ulikam asablivaściaŭ univiersiteta, była b važnaj dla supracoŭnikaŭ», adznačyŭ staršynia prafsajuza.
Razam z tym jon sumniavajecca, što heta mahčyma, bo ŭ kiraŭnictvie zastalisia ludzi, jakija nie išli na prapanovy ab dyjałohu na praciahu niekalkich hadoŭ. Prafsajuz aścierahajecca dalejšych skaračeńniaŭ vykładčykaŭ. «Nakolki nam viadoma, častka prahram budzie zakrytaja abo pierafarmatavanaja», – skazaŭ Tkačoŭ.
Jon paviedamiŭ, što členy prafsajuza płanujuć praanalizavać pryznačeńni Polika na adpaviednaść statutnym dakumientam EHU. Jość mierkavańni, što praces vybaru nie adpaviadaŭ im, dadaŭ Tkačoŭ.
Prafsajuz taksama maje namier źviarnucca da kantralora pa akademičnaj etycy i pracedurach Litvy, da jakoha raniej užo źviartaŭsia ŭ suviazi z masavymi zvalnieńniami vykładčykaŭ EHU u pačatku hetaha navučalnaha hoda. Tady kantralor zafiksavaŭ niekalki faktaŭ parušeńnia statutnych pracedur.
Tkačoŭ paviedamiŭ, što paśla masavych zvalnieńniaŭ prafsajuz źviartaŭsia ŭ Pracoŭnuju inśpiekcyju Litvy, ale jana admoviłasia padtrymać skarhu, i ciapier u administracyjnym sudzie Vilniusa razhladajecca skarha na rašeńnie Pracoŭnaj inśpiekcyi. Prafsajuz taksama płanuje źviartacca ŭ sud na EHU ŭ suviazi va zvalnieńniami vykładčykaŭ.
Daterminova zvolnieny z VNU prafiesar Pavieł Cieraškovič, były staršynia sienata EHU, vykazaŭ BiełaPAN mierkavańnie, što nadziei na Polika jak kiraŭnika niama.
«Mnie zdajecca, što Polik nie samastojnaja fihura, – skazaŭ Cieraškovič. – Va ŭniviersitecie zastanucca ŭsie prablemy, jakija i byli. Dekłarujecca ŭdzieł vykładčykaŭ i studentaŭ u pryniaćci kiraŭnickich rašeńniaŭ u suviazi z tym, što jany buduć pradstaŭlenyja ŭ kirujučym saviecie. Adnak nieviadoma, jakim mienavita čynam jany buduć udzielničać –– u jakaści naziralnikaŭ abo pradstaŭnikoŭ z paŭnavartasnym pravam hołasu. Bajusia, rašeńni buduć prymacca jak i raniej – tryma-čatyrma ludźmi za začynienymi dźviaryma. Univiersitet zastajecca ŭ samaizalacyi ad biełaruskaj hramadzianskaj supolnaści, ad čaho prajhrajuć usie. Donary ličać za lepšaje zapluščvać na heta vočy».
Cieraškovič ličyć, što zajava kirujučaha savieta ab zachavańni biełaruskaha raźvićcia EHU nie bolš jak dekłaracyja. «Na moj pohlad, z takim kiraŭnictvam prajekt siabie vyčarpaŭ. Ludzi mnohija hady zasiadajuć u kirujučym saviecie, ale nie adkazvajuć dziejańniami na situacyju kryzisu», – skazaŭ prafiesar.
«Mnie strašna škada studentaŭ u hetaj situacyi, ale jany zmahli ŭbačyć na spravie ŭzrovień cynizmu ŭ tych ludziej, jakija razmachvajuć ściahami i havorać, što zmahajucca za demakratyju, akademičnyja svabody i inšaje», – reziumavaŭ były vykładčyk EHU.
