Zatrymana 23-hadovaja žycharka vioski Žarabkovičy Lachavickaha rajona, jakaja padazrajecca ŭ zabojstvie svajho muža.
Jak paviedamiła aficyjny pradstaŭnik upraŭleńnia Śledčaha kamiteta pa Bresckaj vobłaści Maryna Drańkova, dniom 18 krasavika ŭ kvatery pa miescy žycharstva viaskoŭka razam z mužam i svajoj maci raśpivała śpirtnyja napoi. Pamiž mužam i žonkaj uźnikła svarka. Padčas kanfliktu žonka naniesła adzin udar nažom u vobłaść hrudnoj kletki 25-hadovamu mužu, ad jakoha toj pamior na miescy.
Žančyna sama pazvaniła ŭ milicyju i paviedamiła, što jaje muž śmiarotna paraniŭsia, adkryvajučy nažom banku z farbaj. Pavodle inšaj jaje viersii, jon zahinuŭ pry padzieńni ź leśvicy. Adnak kryminalny charaktar ranieńnia hetyja viersii abvierhnuŭ.
Pa padazreńni va ŭčynieńni zabojstva žančyna zatrymana i źmieščana ŭ izalatar časovaha ŭtrymańnia. Lachavickim rajonnym adździełam Śledčaha kamiteta ŭ dačynieńni da jaje raspačata sprava na padstavie č. 1 art. 139 KK (zabojstva). 21 krasavika da padślednaj prymienienaja miera strymańnia ŭ vyhladzie źmiaščeńnia pad vartu.
Z udziełam padazravanaj śledčymi praviedziena pravierka pakazańniaŭ na miescy. U miežach rasśledavańnia pryznačany kompleks sudovych ekśpiertyz, praviedzieny dopyty svajakoŭ i susiedziaŭ.
Muž i žonka pražyvali ŭ trochpakajovaj kvatery katedža, vydzielenaj im jak šmatdzietnaj siamji. U siamiejnaj pary troje dziaciej uzrostam da troch hadoŭ, samamu małodšamu — paŭhoda. Ich 23-hadovaja maci znachodziłasia ŭ dekretnym adpačynku, 25-hadovy baćka pracavaŭ traktarystam. Siamja nie była sacyjalna paśpiachovaj.
Pavodle rašeńnia adździeła adukacyi Lachavickaha rajvykankama małaletnija dzieci pieradadzienyja pad časovuju apieku svajakam zabitaha baćki.
