Palitviaźni ŭ abmien na što?

Ź nieaficyjnych krynic stała viadoma, što sustreča pasła Hiebchardta Vajsa z Alaksandram Łukašenkam vyklikała šok i nierazumieńnie u Bruseli. Siak ci tak, ale ŭ paniadziełak na volu vyjšaŭ Artur Fińkievič. Palitykum čakaje: a što ž Kazulin?

U čaćvier 31 studzienia dziaržaŭnaje ahienctva BIEŁTA paviedamiła pra sustreču kiraŭnika Biełarusi z pasłom Niamieččyny ŭ Biełarusi Hiebchardtam Vajsam. Sustreča była niečakanaju, a aficyjnaja infarmacyja pra jaje skamiečanaju. A.Łukašenka, što ŭ pytańniach znakaŭ i pratakołu z hadami staŭ pedantam, pryniaŭ pasła krainy, jakaja vyznačaje biełaruskuju palityku ES, u cikavym kantekście. Spatkańnie adbyłosia napiaredadni palotu A. Łukašenki ŭ Sočy i pa śviežych śladach vychadu na volu troch palitviaźniaŭ – vyzvalenych na asnovie sudovych rašeńniaŭ, što vyhladali nastolki ž sa stoli ŭziatymi, jak i kolišnija rašeńni ab ich źniavoleńni.

Na sustrečy A. Łukašenka vykazaŭ padziaku niamieckamu dypłamatu “za jaho pracu ŭ krainie”, a taksama zaznačyŭ: «Viedaju, što heta sustreča vykliča peŭnaje niezadavalnieńnie ŭ niekatorych vašych kaleh u Biełarusi, ale nam utojvać niama čaho. Udziačny za tuju pazicyju, jakuju vy zajmajecie. Viedaju, što vam nialohka».

A. Łukašenka ličyć pazicyju niekatorych eŭrapiejskich pasłoŭ u dačynieńni da Biełarusi “paradaksalnaj”, «nie zusim razumieje» rolu pasłoŭ krainaŭ ES i ZŠA i navat nia choča «hetaha ŭtojvać». «Toje, što my nikomu nijakich prablem nie stvarajem — ni susiedziam, ni Hiermanii, ni Francyi, ni ZŠA, — heta fakt. Dyk što im ad nas patrebna?» -- pieradała jahonyja słovy pres-słužba

Ambasadarka Francyi Mirej Miuso ŭ paniadziełak prajaśniła sioje-toje ŭ hetych ekivokach: «My viedajem, jakuju rolu ŭ hetym [palitviaźniaŭ Daškieviča i Aŭtuchoviča] vyzvaleńni adyhraŭ spadar Łukašenka. Z pryčynaŭ, jakija ja b nie chacieła tut tłumačyć, pasoł Niamieččyny adyhraŭ sapraŭdy asablivuju rolu», -- skazała jana na pres-kanferencyi. Źviarnuła ŭvahu, što Miuso ŭ toj ža dzień zajaviła, što Francyja “hatovaja supracoŭničać ź Biełaruśsiu ŭ spravach pabudovy AES”.

Adkazvajučy na pytańnie, što ŭ śviatle adzinaj palityki Eŭrasajuzu ŭ dačynieńni da Biełarusi aznačaje sustreča biełaruskaha prezydenta i pasła Niamieččyny, spn. Miuso zaznačyła: «Isnuje adzinaja eŭrapiejskaja palityka. I hetaja palityka zaklučajecca ŭ tym, kab havaryć ab nieabchodnaści pradstaŭleńnia demakratyčnym siłam mahčymaści vykazvać svaje mierkavańni. My vitajem vyzvaleńnie palitźniavolenych i spadziajomsia, što buduć i nastupnyja vyzvaleńni. I my viedajem, jakuju rolu ŭ hetym vyzvaleńni zhulaŭ spadar Łukašenka. Pa pryčynach, jakija ja b nie chacieła tut tłumačyć, pasoł Niamieččyny zhulaŭ sapraŭdy asablivuju rolu, i ja ščaślivaja, što jon hetaj svajoj asablivaj rolaj prynios niejki ŭkład u vyrašeńnie ŭzhadanych mnoj pytańniaŭ».

Adkazvajučy na pytańnie pra mahčymy ŭdzieł Francyi ŭ pabudovie biełaruskaj AES, pasoł zaŭvažyła, što jašče naprykancy 2006 h. jaje papiarednik sadziejničaŭ naładžvańniu kantaktaŭ biełarusaŭ z specyjalistami ŭ sfery atamnaj enerhietyki ź bierahoŭ Rony i Seny. Hetu palityku Francyja pradoŭžyć, padkreśliła spn. Miuso. «Ciapier, kali tak možna skazać, miač jak na baku tych, chto chacieŭ by pabudavać stancyju, tak i na baku tych, chto moh by jaje pabudavać”.

Mahła b -- francuskaja kampanija «Apeva», reaktary jakoj ličacca daskanałymi – Francyja sama vypracoŭvaje 80 % elektraenerhii na AES. «Upeŭniena, što biełaruskija ŭłady, uličvajučy horki vopyt čarnobylskaj katastrofy, prykładuć maksymum namahańniaŭ dla zabieśpiačeńnia biaśpieki prajektu», — skazała pasoł.

Da lipienia Francyja pradstaŭlaje staršynioŭstva Eŭrasajuzu ŭ Biełarusi ad imia Słavienii. U druhim paŭhodździ Francyja budzie staršyniavać ad svajho imia.

Dla bolšaści jahonych krainaŭ Eŭrasajuzu separatnyja kantakty pasła Vajsa stali siurpryzam. Miarkujecca, što hetuju dyplamatyčnuju inicyjatyvu jon prajaviŭ u zhodzie tolki z pasłami Francyi i Italii. Apošnija ihrajuć tut druhuju skrypku, bo Ŭschodniaja Eŭropa – dzialanka Niamieččyny. «Ź nieaficyjnych krynic viedaju, što sustreča pasła Vajsa z Łukašenkam vyklikała šok i nierazumieńnie u Bruseli”, skazaŭ nam palitolah Dzianis Mieljancoŭ.

«Łukašenka viadzie z Zachadam hulniu na pavyšeńnie stavak», miarkuje dyrektar Biełaruskaha instytutu stratehičnych daśledavańniaŭ Vital Silicki. Charakterna, što akurat paśla sustrečy Pucina i Łukašenki ŭ Sočach dziaržaŭnaje infarmacyjnaje ahienctva BIEŁTA źmiaściła vyniki “apytańnia hramadzkaj dumki”, jakoje nibyta było praviedzienaje Infarmacyjna-analityčnym centram pry Administracyi prezydenta. Ź ich vynikaje, što biełarusy schilajucca da ŭmacavańnia suviaziaŭ z Zachadam. “Dla kiraŭnika Biełarusi kantakty z Zachadam – heta iznoŭ taki šantaž Maskvy”, -- ličyć Silicki.

Palitolah Alaksandar Fiaduta bolš aptymistyčny. Jon upeŭnieny, što sustreča A.Łukašenki z pasłom Niamieččyny aznačaje pačatak dyjalohu z Eŭropaj. «Łukašenka faktyčna paskardziŭsia Vajsu na padvojnyja standarty. Zachad lepš stavicca da Nazarbajeva z Karymavym, čym da Łukašenki. Toj davodzić, što nia horšy za svaich kalehaŭ i čakaje da siabie adpaviednaha staŭleńnia».

Praciah jość: u paniadziełak adnym rosčyrkam sudziejskaha piara na volu byŭ adpuščany Artur Fińkievič. Bolš za toje, iduć čutki ab vyzvaleńni takoha zaklataha asabistaha voraha, jak Kazulin.

Apazycyja, adnak, nia maje iluzijaŭ nakont źmieny atmasfery ŭ krainie. Ahulnaja kolkaść asobaŭ, zakranutych palityčnymi represijami, vyrasła ŭ 2008 hodzie proci 2007-ha na 40 %. Hiperreakcyja na vystup pradprymalnikaŭ supała ź niemahčymym navat u isłamskich tyranijach asudžeńniem žurnalista Źdźvižkova. Supracoŭniki KDB akazvajuć psychalahičny cisk na kožnaha, chto sprabuje zajmacca arhanizavanaj palityčnaj dziejnaściu ŭ rehijonach. Adznačanyja pieršyja sproby abmiežavać svabodu vyjezdu za miažu, a pa-nad usim hetym razrastajecca idealahičnaja vertykal, jakaja faktyčna ŭjaŭlaje saboj razhalinavany aparat pa lakalizacyi inšadumstva. Vychad na svabodu hrupy palitviaźniaŭ -- zaŭvažny žest, jaki adnak ničoha nie mianiaje ŭ sutnaści biełaruskaj systemy samadziaržaŭja.

Tym nia mienš, Dzianis Mieljancoŭ upeŭnieny, što plusy dyjalohu pieravažvajuć minusy. “Heta adkryvaje mahčymaści dla novych suviaziaŭ u palitycy, ekanomicy, tamu sustreču Łukašenki i Vajsa možna aceńvać pazytyŭna».

• 0
• 0
• 0
• 0
• 0
• 0
• 0
• 0