Hrupa žančynaŭ — svajačak asudžanych, a taksama niazhodnych z rašeńniami sudoŭ pa svaich hramadzianskich spravach, što navat sprabavali šukać praŭdy z dapamohaj prezydenta Rasiei, — zładzili ŭ čaćvier pres-kanferencyju.
Praŭnik Tamara Siarhiej raspačała sustreču z cytaty staršyni Viarchoŭnaha suda Valancina Sukały: «Dla nas razhlad luboj spravy patrabuje maksymalnaj addačy i vysokaha prafesijnaha majsterstva, bo za kožnaj ź ich stajać čałaviečyja losy, žyćciovyja intaresy i pravy ludziej». Temaj pres-kanferencyi była acenka dziejnaści sučasnaj sudovaj systemy Biełarusi: ci zaŭsiody vyraki sudoŭ spraviadlivyja i abhruntavanyja i jak chutka vypraŭlajucca imaviernyja pamyłki sudździaŭ.
«Ludzi, što siońnia tut sabralisia, raspaviaduć roznyja žyćciovyja historyi. Ale ich jadnaje adno — nieabhruntavanyja i niespraviadlivyja prysudy suprać ich, ci ich blizkich, a taksama niezakonnaje ihnaravańnie ich sprobaŭ adnaŭleńnia spraviadlivaści z boku čynoŭnikaŭ» — adznačyła Tamara Siarhiej.
«U časie śledztva syna try dni trymali hołym u kamery, źbivali, parvali lohkaje i jon nia vytrymaŭ — uziaŭ vinu na siabie, bo dumaŭ, što sud usio pastavić na miescy», — płačučy raskazvaje maci.
Pavodle jaje słovaŭ, akramia «pryznańnia» syna ŭ śledčych nie było nijakich dokazaŭ.
«Ja, Alaksandar Krot, na dadzieny momant — bomž. U 2004 h. ja atrymaŭ invalidnaść, pryčyna — byŭ likvidadatarm na ČAES. U tym ža hodzie praz sud maja byłaja žonka pazbaviła mianie ilhotaŭ i žylla» — raspavioŭ adzin z udzielnikaŭ sustrečy, žychar Miensku.
Sp. Krot nia moža zrazumieć, navošta było addavać zdaroŭje ŭ Čarnobyli, kab hadami zmahacca z čynoŭnikami za svajo prava na žyllo.
Syn Łarysy Kačatkovaj staŭ achviaraj mienskich ryełtarskich ahiencyjaŭ — i voś užo niekalki hod žančyna šukaje praŭdy ŭ sudach, kabinetach prakuratury, piša Łukašenku listy: «Ja pisała prezydentu, što našyja čynoŭniki nanosiać značna bolšuju škodu ŭładzie, čym apazycyja, ale adkazu nie atrymała».
Nichto z prysutnych nia zdoleŭ adšukać praŭdy va ŭłasnaj krainie paasobku. Pavodle słoŭ Ludmiły Kučury, na svaje kankretnyja pytańni žančyny «atrymlivajuć adpiski ad słužbovych asobaŭ sudoŭ i Hieneralnaj prakuratury», a z mnohimi ź ich «čynoŭniki naohuł spynili pierapisku». Taksama jana raskrytykavała pracu mienskaha pradstaŭnictva AAN — jaje skarha, dasłanaja na mienski adras arhanizacyi dahetul nie adpraŭlenaja ŭ Ženievu. Spn. Kučura kaža, što maje źviestki pra vypadki, kali padobnyja skarhi tak i nie traplali da razhladu.
Nie znajšoŭšy padtrymki i razumieńnia ŭ svajoj krainie, žančyny zhurtavalisia, kab razam pasprabavać pryciahnuć uvahu da svaich prablemaŭ pa-za miežami Biełarusi. Dziela hetaha jany zładzili šerah akcyjaŭ — pikietavali pasolstva Biełarusi ŭ Kijevie, pratestavali ŭ Rasiei ŭ časie samitu «vialikaj vosiemki», nakiravali prezydentu Rasiei siem telehramaŭ z prośbaj pasadziejničać sustrečy ź biełaruskim prezydentam, a taksama pisali staršyni PASE Rene van der Lindenu.
U Biełarusi žančyny ŭdzielničali ŭ Sacyjalnym maršy ŭ listapadzie minułaha hodu, źviartalisia ź listami da staršyni Viarchoŭnaha suda Valancina Sukały, hienprakurora Piatra Mikłaševiča, sakratara Rady Biaśpieki Viktara Šejmana, Mitrapalita Fiłareta. Apošni — adziny, chto paabiacaŭ źviarnucca da Łukašenki z prośbaj dapamahčy žančynam.
Nieadnarazovyja zvaroty da samaho prezydenta nie prynieśli plonu. 9 studzienia hetaha hoda jany znoŭ źviarnulisia ŭ Administracyju prezydenta z prośbaj ab asabistym pryjomie ŭ Alaksandra Łukašenki, adnak 11 studzienia atrymali admovu za podpisam načalnika ŭpraŭleńnia pa pracy sa zvarotami hramadzian Administracyi prezydenta Stanisłava Buko.
«Našyja čynoŭniki ŭ ŚMI rasceńvajuć uvahu mižnarodnych strukturaŭ da pytańniaŭ pravoŭ čałavieka ŭ Biełarusi, jak umiašalnictva va ŭnutranyja spravy krainy» — zaŭvažaje Łarysa Kačatkova.
Jana ličyć, što ŭ sytuacyi, kali prablemy hramadzianaŭ ihnarujucca ŭładami ichniaj ža krainy, uvaha i padtrymka z boku inšych krainaŭ budzie vitacca pakryŭdžanymi. Naš prezydent nie sustreŭsia z nami i tamu ja ŭdziačnaja amerykanskaj ambasadzie i asabista prezydentu ZŠA za toje, što jon hety čas znajšoŭ, udziačnaja za ŭvahu da nas, skazała žančyna.
«U dadzienym vypadku čynoŭniki majuć spravu nie z apazycyjnymi palitykami, ź jakimi jany ŭžo daŭno vypracavali nadziejny mechanizm dačynieńniaŭ» — padkreśliła naprykancy sustrečy Tamara Siarhiej. Ciapier ułada sutykniecca z prostymi ludźmi, jakija ad jaje paciarpieli i pačali arhanizoŭvacca, kab damahčysia spraviadlivaści. Samaarhanizacyja pakryŭdžanych hramadzianaŭ — heta strašniej za apazycyju, ličyć praŭnik.
Pa vynikach pres-kanferencyi było vyrašana praciahvać akcyi pratestu i rychtavać zvaroty ŭ dziaržaŭnyja orhany i da zamiežnych arhanizacyjaŭ. Była ahučanaja i padtrymanaja ŭsimi ideja vydać asobnym zbornikam spravy paciarpiełych. Materyjał, pa zapeŭnivańniach prysutnych, sabrany — kožny dakument, usie listy-adpiski, zastałosia tolki nadrukavać.
Ciapier čytajuć
Zahinuŭ biełaruski dobraachvotnik Vasil «Dzir» Rapicki10
Kamientary