World of Warcraft. Skrynšot geforce.com
Samaja papularnaja płatnaja anłajn-hulnia śvietu praciahvaje hublać padpisantaŭ, niahledziačy na ŭdałaje abnaŭleńnie, zaŭvažaje Kanobu. Zhodna z apošniaj spravazdačaj, za apošnija try miesiacy kolkaść hulcoŭ źmienšyłasia z 10 da 7,1 młn.
World of Warcraft hublaje padpisantaŭ z kanca 2010 hoda, kali ich kolkaść dasiahnuła piku ŭ 12 młn.
Dapaŭnieńnie Warlords of Draenor padniała ich kolkaść z 7,4 młn da 10 — ale ŭ vyniku syšło bolš, čym pryjšło.
Vydaviec Activision Blizzard nie ździŭleny takim chodam padziej: dva papiarednija dapaŭnieńni taksama spačatku pryvablali bolš karystalnikaŭ, ale zatym hulcy sychodzili. Praŭda, nastolki značnaha ŭźlotu-padzieńnia raniej nie było.
Sa stratami prybytku ad hulni vydaviec raźbirajecca prostaj mieraj: padvyšeńniem cany na padpisku z 12 da 13 jeŭra na miesiac.
Kampanija nahadvaje, što, niahledziačy na stratu hulcoŭ, World of Warcraft zastajecca najvialikšaj anłajn-hulnioj pa padpiscy.
Padobna, što vydaviec nie źbirajecca mianiać madel padpiski na ŭmoŭna biaspłatnuju, niahledziačy na jaje bolšuju papularnaść.
Naprykład, va ŭmoŭna-biaspłatnyja World of Tanks hulajuć bolš za 100 młn čałaviek pa ŭsim śviecie. Dy i ŭłasnaja ŭmoŭna-biaspłatnaja Heroes of the Storm, jakuju Activision Blizzard pakul vypuścili tolki ŭ beta-viersii, užo maje 11 młn padpisantaŭ.
Ale pa źviestkach SuperData na krasavik 2014 hoda World of Tanks prynosić tolki 4,51 dalara na miesiac z aktyŭnaha karystalnika (takich na miesiac naličyli 9,1 młn). Heta najlepšy pakaźnik siarod umoŭna-biaspłatnych hulniaŭ. World of Warcraft ža kaštuje ad 13 da 15 dalaraŭ na miesiac kožnamu sa svaich 7,1 młn karystalnikaŭ.
