A prezident Ukrainy Piatro Parašenka, vystupajučy ŭ Viarchoŭnaj Radzie z nahody 70-hodździa pieramohi nad nacyzmam u Jeŭropie, pravioŭ paralel pamiž pradvajennaj situacyjaj u Jeŭropie 1930-ch hadoŭ i ciapierašnim kanfliktam na ŭschodzie krainy.
Pry hetym jon vykazaŭ upeŭnienaść u tym, što bajavyja dziejańni na ŭschodzie zavieršacca pieramohaj ŭkrainskaj armii.
Na pasiadžeńni parłamienta, akramia deputataŭ, prysutničali vieterany, jakija vajavali ŭ šerahach savieckaj armii i UPA, a taksama bajcy śpiecapieracyi ŭkrainskich sił suprać uzbrojenych prychilnikaŭ DNR i ŁNR na ŭschodzie Ukrainy, byłyja i ciapierašnija čynoŭniki, pradstaŭniki dypłamatyčnaha korpusa i śpiecyjalny hość — hienieralny sakratar AAN Pan Hi Mun.
U svaim vystupie prezident Ukrainy nazvaŭ «zanadta vidavočnymi» paraleli pamiž padziejami ŭ Jeŭropie ŭ kancy 30-ch hadoŭ minułaha stahodździa i ciapierašnim kanfliktam.
«Nam nie treba tłumačyć, što takoje akupacyja čechasłavackich Sudetaŭ, pakolki ŭ nas častkova akupavanyja dźvie našyja vobłaści — Danieckaja i Łuhanskaja. Nam nie treba nahadvać, što takoje anšlus Aŭstryi. My vielmi dobra heta zasvoili na prykładzie anieksii Kryma», — zajaviŭ Parašenka.
U svajoj pramovie ŭkrainski lidar źviarnuŭsia da zajavy rasiejskaha prezidenta Uładzimira Pucina 2010 hoda ab tym, što biez Ukrainy Rasija ŭsio roŭna pieramahła b nacysckuju Hiermaniju, nazvaŭšy hetyja słovy «ździekam nad pamiaćciu zahinułych voinaŭ i nad pačućciami žyvych vieteranaŭ».
Rasijski lidar vymaviŭ hetuju frazu ŭ śniežni 2010 hoda jašče ŭ bytnaść premjeram, adkazvajučy na repliku lidara bajkierskaha ruchu Alaksandra Załdastanava (Chirurha) ab tym, što Rasija pieramahła ŭ Vialikaj Ajčynnaj vajnie dziakujučy adzinstvu u tym liku z Ukrainaj.
«My ŭsio roŭna pieramahli b, tamu što my — kraina pieramožcaŭ, — skazaŭ tady Pucin. — Kali my pahladzim statystyku časoŭ Druhoj suśvietnaj vajny, to vyśvietlicca, što najbolšyja straty ŭ VAV paniesła mienavita RSFSR — bolš za 70% strat. Heta značyć, što vajna vyjhranaja, nie chaču nikoha kryŭdzić, ale ŭ asnoŭnym za košt čałaviečych i industryjalnych resursaŭ Rasii. Heta histaryčny fakt».
Piatro Parašenka žorstka krytykavaŭ hetaje vykazvańnie Pucina piacihadovaj daŭnaści.
«Ci nie vyjhrali b hetaj vajny biez Ukrainy… A voś, darečy, pra toje, ci pačałasia b vajna, kali b u Kramli nie padpisali pakt Mołatava-Rybientropa, možna było b i paspračacca. Bo mienavita hety pakt adkryŭ apošnija šluzy, jakija strymlivali vajnu», — zajaviŭ Parašenka.
Miž tym pres-słužba Kramla paviedamiła 8 maja, što prezident Rasii pavinšavaŭ z Dniom pieramohi lidaraŭ krain SND, a taksama narody Ukrainy i Hruzii — lidaraŭ dźviuch hetych krain Maskva vinšavać piersanalna nie stała.
Prezident Ukrainy zajaviŭ, što, choć maštaby kanfliktu na ŭschodzie Ukrainy mienš, čym maštaby Druhoj suśvietnaj vajny, «(ich) pryčyny tyja ž».
Pad sousam baraćby za viartańnie spradviečnych ziemlaŭ i za pravy ruskaha nasielnictva adbyvajecca hrubaje parušeńnie mižnarodnaha prava, dadaŭ Parašenka.
Prezident zajaviŭ, što mienavita ruskamoŭnaje nasielnictva Ukrainy bolš za ŭsio paciarpieła ŭ vyniku kanfliktu na ŭschodzie krainy.
Ukraina, NATA i šerah zachodnich krain zajaŭlajuć, što Rasija pastaŭlaje bajavikam samaabvieščanych Danieckaj i Łuhanskaj «narodnych respublik» vajennuju techniku, a na baku ich uzbrojenych farmiravańniaŭ vajujuć kadravyja rasijskija vajskoŭcy. Aficyjnaja Maskva admaŭlaje infarmacyju ab svaim dačynieńni da kanfliktu.
«Ruskamoŭnyja hramadzianie Ukrainy svaju ŭkrainskuju Radzimu lubiać nie mienš, čym ruskija svaju… U ATA, dzie jak minimum kožny druhi voin ruskamoŭny, jany vajujuć i dakazvajuć, što na ruskaj movie lubić Ukrainu možna nie mienš, čym na ŭkrainskaj», — zajaviŭ Piatro Parašenka pa-rusku.
Parašenka ahučyŭ dadzienyja AAN, zhodna ź jakimi bajavyja dziejańni zabrali žyćci kala šaści tysiač mirnych hramadzian Ukrainy. Akramia taho, pa słovach prezidenta, padčas kanfliktu zahinuli 1675 ukrainskich vajskoŭcaŭ.
Ciapier čytajuć
Mackievič: Cichanoŭskuju źniać, zamianić, pieraabrać nielha. Nie mučajciesia. Nielha — i ŭsio44
Kamientary